Presidenti Begaj në konferencën e Trojkës së SCEEP: Integrimi në BE, fokusi i kryesisë shqiptare

Presidenti Bajram Begaj nga Shkupi, tha se Shqipëria mbetet një mbështetëse entuziaste dhe proaktive e bashkëpunimit rajonal. Ky bashkëpunim për të përmirëson jetesën e qytetarëve, forcon marrëdhëniet e fqinjësisë së mirë dhe ndihmon proceset integruese Euroatlantike.

Gjatë një konference për shtyp, në përfundim të Samitit të Procesit të Bashkëpunimit të Evropës Juglindore (SEECP), presidenti Begaj në krah të presidentes së Maqedonisë së Veriut, Gordana Silanovska-Davkova dhe presidentit të Malit të Zi, Jakov Milatović, theksoi rëndësinë e forcimit të kësaj organizate për rajonin.

Ndërsa përgëzoi Shkupin për lidershipin dhe vizionin evropian që tregoi gjatë ushtrimit të kryesimit të radhës së SEECP, Begaj bëri të ditura prioritetet e Shqipërisë, e cila do të marrë kryesimin e radhës.

Kreu i shtetit deklaroi se çështjet parësore kanë të bëjnë me procesin e integrimit evropian, rritjen e qëndrueshme ekonomike, Agjendën e Gjelbër dhe Digjitale, turizmin, kulturën dhe ndërlidhshmërinë. Kryesimi nga Tirana për herë të tretë i Procesit të Bashkëpunimit të Evropës Juglindore (SEECP), sipas Presidentit Begaj, krijon lehtësi, pasi kjo udhëheqje do të bazohet në përvojat dhe sukseset e mëparshme.

Gjatë këtij kryesimi, Begaj deklaroi se motoja do të jetë “Të formësojmë të ardhmen tonë evropiane”, duke e vendosur integrimin në BE në qendër të drejtimit të radhës së Procesit të Bashkëpunimit të Evropës Juglindore (SEECP).