Presidenti Meta iu bashkohet aktivistëve dhe ambientalistëve në protestë: Vjosa, të shpallet Park Kombëtar

Kryesore Politikë E Mërkurë, 17 Mars 2021 13:06

Aktivistë të Shoqërisë Civile dhe ambientalistë, protestuan këtë të mërkurë pranë sheshit “Nënë Tereza” në Tiranë për të mbrojtur lumin Vjosa si dhe të shpallet Park Kombëtar. Në qendër të sheshit u shkrua në gjuhën angleze “Vjosa park kombëtar tani”.

Kësaj proteste iu bashkua edhe Presidenti Ilir Meta, i cili u shpreh se lumi Vjosa së bashku me degët e saj duhet të shpallet Park Kombëtar, pasi është një pasuri e rrallë kombëtare.

”Është një detyrim për mua si presidenti i Republikës që të jem në përkrahje, në sintoni të plotë me 36 organizata evropiane dhe botërore e që janë bashkuar në këtë iniciativë për mbrojtje të lumit Vjosa dhe kërkojnë shpalljen park kombëtar të lumit Vjosa dhe të gjithë degëve”.

Kreu i shtetit theksoi se ky lum është ”pasuri e rrallë edhe për kontinentin tonë, që duhet mbrojtur nga çdo projekt që e cenon atë”,-tha Meta. Po ashtu në mbrojtje të lumit Vjosa ka dalë edhe aktori i njohur amerikan Leonardo DiCaprio, i cili prej vitesh është kthyer një zë i fortë i kauzave mjedisore.

“Me shumë kënaqësi mbështeta sot nismën e mrekullueshme të aktivistëve mjedisorë për përgatitjen e një mesazhi sensibilizues ndërkombëtar për mbrojtjen e Vjosës nga çdo projekt shkatërrimtar dhe krijimin e Parkut Kombëtar përgjatë gjithë lumit duke përfshirë edhe degët e tij.

I përgëzova për mesazhin e mençur të vendosur në Sheshin kryesor të Tiranës “Nënë Tereza”, që shumë shpejt do të shfaqet edhe në shumë kryeqytete të Europës.

Mirënjohje të gjithë aktivistëve, akademikëve e shkencëtarëve vendas dhe të huaj, 36 organizatave mjedisore, autoriteteve të BE, si dhe aktorit të jashtëzakonshëm Leonardo DiCaprio, për ndërkombëtarizimin e kësaj kauze.

Qeveria ende në detyrë të dëgjojë zërin me shumë integritet të tyre dhe të komunitetit për t’u tërhequr urgjentisht nga çdo projekt arbitrar, që shkatërron këtë pasuri e trashëgimi natyrore kombëtare dhe europiane.

Ne, gjenerata e sotme, kemi detyrimin për të mbrojtur burimet dhe pasuritë tona natyrore, për të gjithë brezat e ardhshëm.

E DUAM VJOSËN DHE DO TA MBROJMË!”, shprehet Presidenti Ilir Meta teksa publikon dhe pamjet nga protesta e sotme tek Shehi “Nënë Tereza”

Me shumë kënaqësi mbështeta sot nismën e mrekullueshme të aktivistëve mjedisorë për përgatitjen e një mesazhi…

Pubblicato da Ilir Meta su Mercoledì 17 marzo 2021

ETIKETA Aktivistë dhe ambientalistë