Presidenti Meta letër Kolegjit të Posaçëm të Apelimit: Nisni procedimin disiplinor ndaj Fjona Papajorgjit

Presidenti Ilir Meta ka kërkuar nga Kolegji i Posaçëm i Apelimit që të nisë një procedim disiplinor ndaj anëtares së Gjykatës Kushtetuese, Fjona Papajorgjit.

Sipas kreut të shtetit, ajo ka kryer “shkelje të rënda profesionale dhe etike që diskreditojnë figurën e gjyqtarit kushtetues”.

Presidenti Meta i ka përcjellë KPA-së edhe të dhëna dhe prova që sipas tij “kërkojnë domosdoshmërisht nisjen e procedimit disiplinor ndaj gjyqtarit të Gjykatës Kushtetuese të Republikës së Shqipërisë”.

Provat kanë të bëjnë mbi shkeljet e kryera nga gjyqtarja e Kushtetueses në vendimmarrjen për zgjedhjet vendore të 30 qershorit 2019.

“Pas shqyrtimit të të gjithë dosjes gjyqësore që na është përcjellë nga Gjykata Kushtetuese, rezultojnë disa të dhëna e fakte që bëjnë të detyrueshme t’ju përcjellim këtë informacion të shoqëruar me prova bindëse të cilat konfirmojnë se, ka të dhëna mëse të mjaftueshme se një gjyqtar i Gjykatës Kushtetuese dhe konkretisht zonja Fiona Papajorgji dhe relatore e kësaj çështje ka konsumuar shkelje të rënda profesionale dhe etike që diskreditojnë pozitën dhe figurën e gjyqtarit gjatë ushtrimit të mandatit.

Përsa rezulton në dosje ekziston dyshimi ynë se në këtë veprimtari në kundërshtim me kërkesat e ligjit nr. 8577/2000, mund të jenë përfshirë edhe disa anëtarë të tjerë të Gjykatës Kushtetuese.

Këto të dhëna sipas parashikimeve të nenit 128 të Kushtetutës dhe nenin 10, 10/a të ligjit nr. 8577/2000, kërkojnë domodosmërisht që nga ana juaj të merren masa për fillimin menjëherë të procedimit disiplinor dhe të merren masa emergjente dhe të themelta në lidhje me këtë procedim disiplinor sipas ligjit”, thuhet ne kerkesen e Metes.