Presidenti Meta në Horën e Arbëreshëvet: Model për marrëdhëniet tradicionale të shkëlqyera Shqipëri-Itali

Presidenti i Shqipërisë, Ilir Meta vijon vizitën te Arbëreshët në Siçili të Italisë. Sot ai u prit në Horën e Arbëreshëvet, ku siç tregon në facebook, kjo zonë është një model për marrëdhëniet tradicionale të shkëlqyera midis Shqipërisë dhe Italisë, që meritojnë të zhvillohen më tej. ”Mirënjohës për pritjen vëllazërore nga Kryetari i Bashkisë, z.Rosario Petta, autoritetet lokale dhe në veçanti nga arbëreshët e dashur”.

Postimi i plotë

Thellësisht i lumtur dhe i emocionuar të ndodhem në Horën e Arbëreshëvet (Piana degli Albanesi), kryeqytetin e arbëreshëve të Siçilisë, të krijuar pesë shekuj më parë nga familjet shqiptare, që ende sot trashëgojnë kujtimin e Heroit tonë Kombëtar, Gjergj Kastrioti Skënderbeu. Mirënjohës për pritjen vëllazërore nga Kryetari i Bashkisë, z.Rosario Petta, autoritetet lokale dhe në veçanti nga arbëreshët e dashur.

Vendosja prej tyre e flamurit të Kosovës🇽🇰, në krah të flamujve të Shqipërisë🇦🇱 dhe Italisë🇮🇹 mike e bëri edhe më të veçantë këtë vizitë, duke dëshmuar ndjenjat e forta kombëtare që kanë rrënjë të thella në zemrën e këtij komuniteti.

Promovim dhe vëmendje ndaj kësaj pasurie të çmuar të trashëgimisë europiane dhe botërore, që meriton plotësisht të bëhet pjesë e UNESCO. Hora e Arbëreshëvet është një model për marrëdhëniet tradicionale të shkëlqyera midis Shqipërisë dhe Italisë, që meritojnë të zhvillohen më tej.