Presidenti Meta, ambasadores së Francës: Do t’i jap edhe një mundësi të fundit Parlamentit njëpartiak për të respektuar Marrëveshjen

Presidenti Ilir Meta ka pritur në takim ambasadoren e Francës, Christina Vasak, me rastin e përfundimit të misionit të saj në Shqipëri dhe ka folur sërish për ndryshimet në Kodin Zgjedhor dhe marrëveshjen e 5 qershorit.

Në një postim në Facebook, Presidenti Meta shkruan se “do t’i japë edhe një mundësi të fundit parlamentit njëpartiak ta respektojë pas kërkesës publike të PPE“.

“Me rastin e përfundimit të misionit në Shqipëri, prita në një takim, Ambasadoren e Francës, Sh.S.Znj Christina Vasak.
Vlerësova rolin e saj aktiv për forcimin e marrëdhënieve dypalëshe, dhe për mbështetjen e sinqertë ndaj procesit të integrimit europian të vendit tonë.

Duke e falenderuar për kontributin thelbësor të Francës në avancimin e Shqipërisë drejt Bashkimit Europian, konfirmova se vendimi politik i Këshillit Europian i marsit për çeljen e negociatave të anëtarësimit është një mundësi historike për vendin tonë.

Theksova se, fatkeqësisht, Shqipëria është ende shumë larg përmbushjes së kushteve që kërkohen për zhvillimin e Konferencës së Parë Ndërqeveritare, me shkeljen brutale dhe të njëanshme nga ana e mazhorancës së Marrëveshjes konsensuale të 5 Qershorit.

Por unë do t’i jap edhe një mundësi të fundit Parlamentit njëpartiak për të respektuar Marrëveshjen pas kërkesës publike të Partisë Popullore Europiane.

Shpreha besimin se hyrja në fuqi e Marrëveshjes me Agjencinë Franceze të Zhvillimit (AFD), do t’i japë një shtysë të rëndësishme projekteve zhvillimore në Shqipëri, si dhe do të rrisë interesimin për prani më të madhe ekonomike të Francës në Shqipëri”- shkruan kreu i shtetit në një postim në Facebook.