Pse mungoi në ”Foltoren” e Shkodrës? Topalli: Berisha ndihmë s’ka kërkuar as në ’97-ën

”Foltorja për një PD më të fortë”, po lëviz në çdo cep të Shqipërisë. Në takimin që Sali Berisha pati me demokratët në Shkodër, shumëkush pyeti për mungesën e ish-kryeparlamentares Jozefina Topallit, e cila që në fillim doli kundër Lulzim Bashës.

Për ”A2cnn”, ajo thotë se Berisha nuk kërkon ndihmë nga askush, madje për të nuk e ka bërë as në vitin 1997. Po ashtu ajo ka treguar se Berisha ka kërkuar ndjesë për këtë situatë ku ndodhet PD-ja.

“Kam komunikuar me zotin Berisha, por zoti Berisha nuk kërkon ndihmën e askujt. Ai i ka dalë përballë vetë situatës së tillë, ka kërkuar ndjesë. Është një komunikim krejt i njerëzishëm. Ai kurrë nuk ka kërkuar ndihmë as në vitin 1997. S’është nevoja për të kërkuar ndihmë, në fund të fundit është hapur një proces që i shërben gjithkujt, vendit mbi të gjitha”, tha Topalli.