Qëndrimet e forta nga SHBA dhe BE për mandatin e Xhaçkës, Spiropali: Dakord me ju, por kemi nevojë për sqarim

Kryeparlamentarja Elisa Spiropali i përgjegjet qëndrimit të ambasadës së SHBA-së dhe asaj të BE në lidhje me votimin e fundit të mazhorancës për të mos dërguar mandatin e Olta Xhaçkës pranë Gjykatës Kushtetuese. Spiropali shkruan se vendimi i Gjykatës Kushtetuese ka nevojë për sqarim dhe për këtë arsye ajo i është drejtuar Komisionit të Venecias për një opinion të qartë.

“Ndaj plotësisht bindjen se zbatimi i vendimeve të Gjykatës Kushtetuese nga Parlamenti është një çështje thelbësore, pasi lidhet me kontrollet dhe balancat institucionale në sistemin demokratik të vendit. Prandaj edhe e theksova gjatë hapjes së sesionit parlamentar javën e kaluar, si prioritet nevojën që Kuvendi të ndjekë vendimet e mbetura të Gjykatës Kushtetuese.

Votimi i djeshëm demonstroi se vendimi i Gjykatës Kushtetuese të një viti e gjysmë më parë dhe së fundmi ai i Korrikut 2024, ka nevojë për sqarimin që kërkohet prej po kaq kohësh.

Pikërisht me qëllim marrjen e këtij sqarimi dhe dhënien fund të paqartësisë që e ka shoqëruar Kuvendin, për mënyrën e zbatimit të vendimit, i jam drejtuar menjëherë sot Komisionit të Venecias si një instancë me prestigj e kompetencë të padiskutueshme.

Sapo të marrim nga Komisioni i Venecias opinionin përkatës, do të veprojmë sipas atij opinioni pa humbur asnjë ditë më shumë”, shkruan Spiropali.