”Qeveria e Berishës ”llum””, Nishani: Basha është njeriu i gafave. PD në krizë të madhe identiteti

Ish-presidenti i Shqipërisë, Bujar Nishani thotë se Lulzim Basha është njeriu i gafave dhe se PD-ja është në një krizë të madhe identiteti. Ky reagim i Nishanit vjen pasi në media janë publikuar lajme që shkruajnë se Lulzim Basha e ka cilësuar si ”llum” qeverisjen e Sali Berishës.

”Kujt i referohet llum z. Basha? Ka qenë në drejtimin e ministrive më të rëndësishme në atë qeverisje. T’i drejtohesh si llum, tregon krizë identiteti. Nëse ka një qeverisje që i dha kosto PD, është qeverisja e Bashës si kryebashkiak në Tiranë. Ai kishte krijuar llum me mosqeverisjen e tij ”de facto” në Tiranë.

Unë kryetar opozite që të bëjë kaq shumë gafa, nuk kam ndeshur asnjëherë në të shkuarën. Për fatin e keq, shumë e hidhur për mua, PD është jo vetëm në një krizë të madhe politike dhe elektorale, por edhe në një krizë të madhe identitet, që duhet zgjidhur me çdo kusht.

Thelbi i çështjes nuk është se kush do të jetë nesër alternativa e Lulzim Bashës, por si do të ndërtohet alternativa e PD, përfshirë dhe drejtuesin, kryetarin nesër. Unë mendoj se kjo është sfida realisht e PD dhe kjo në fakt duhet të jetë. Nuk mund ta mohojë askush që sot ka problem mes Bashës e Berishës, por nuk është thelbi. Thelbi nuk është alternativa e Bashës sot për sot”,-tha në ”News 24”.