Rama dhe Vuçiç presion me bojkot samitin e BE/ Berisha: Veprime pro serbo-ruse, shqiptarët të ngrihen në këmbë

Qëndrimin e Edi Ramës dhe të presidentit të Serbisë për mospjesëmarrjen në Samitin e BE-së për Ballkanin Perëndimor, kryetari i PD-së Sali Berisha i lexon si veprime pro serbo-ruse nga ana e kryeministrit shqiptar. Përmes një reagimi në facebook, Berisha thekson se shqiptarët duhet të ngrihen në këmbë për të mbrojtur orientimin dhe integrimin e tyre. ”I urdhëruar nga Putin vetëm e vetëm për të shënuar kthesën e rajonit drejt projektit serbo-rus të Ballkanit të Hapur me të cilin vendosën në rajon hegjemonizmi serb dhe influenca ruse”.

Reagimi i plotë

Aleanca pro Putin në Ballkan reagon! Vuçiç dhe Rama kërcënojnë BE me mospjesëmarrje në Samitin e Brukselit. Të dashur miq, në një qëndrim sinkron në Beograd dhe Tiranë, Presidenti i Serbomadhisë Aleksander Vuçiç dhe vasali i tij Edi Rama kërcënojnë me mospjesmarrje në Samitin e liderve të vendeve të BE, që do të mbahet në Bruksel më datë 23 qershor, dhe në të cilin janë të ftuar edhe udhëheqësit e vendeve të Ballkanit Perendimor.

Ky kërcënim i dy gangstereve autokrat të Ballkanit Perendimor, presidentit të serbomadhisë Vuçiç dhe vasalit te tij Rama, duket si i urdhëruar nga Putin vetëm e vetëm për të shënuar kthesën e rajonit drejt projektit serbo-rus të Ballkanit të Hapur me të cilin vendosën në rajon hegjemonizmi serb dhe influenca ruse.

Dënoj me forcën më të madhe këtë qëndrim antikombëtar dhe anti BE pro serbo-rus të Edi Ramës dhe ftoj shqiptarët të ngrihen në këmbë për të mbrojtur orientimin dhe integrimin euroatllantik të tyre!