Rama flet për negociatat: Vendet e BE kanë nivel të caktuar hipokrizie

Zgjerimi i Bashkimit Europian, pritet që të marrë një vendim në Samitin e Zagrebit për hapjen ose jo të negociatave me vendet e Ballkanit Perëndimor. Është miratuar edhe një metodologji e re, që përcakton edhe procesin e zgjerimit, por kryeministri Edi Rama është zhgënjyes nga vendet e BE.

Nga SHBA-ja, Rama tha se këto vende kanë një nivel hipokrizie, pasi do të ishte më e ndershme të thonë që kanë probleme mes tyre dhe jo me Shqipërinë apo Maqedoninë e Veriut. Kreu i qeverisë theksoi se qëndrimi i Francës dhe Presidentit Macron nuk ka të bëjë me Shqipërinë.

”Ajo çfarë po ndodh gjatë këtyre ditëve e bën të qartë. Nuk ka të bëjë me ne. Ka të bëjë me ata, me vendimin e tyre se çfarë duan për veten e tyre dhe procesin e zgjerimit. Kanë një nivel të caktuar hipokrizie sepse do të kishte qene shumë më tepër e natyrshme dhe e ndershme që të thonin: Ju i keni bërë detyrat, por ne nuk jemi gati sepse duhet të zgjidhim ca probleme. Presidenti francez ka qenë më i drejtpërdrejti. Është e lehtë ti thuash një vendi si Shqipëria apo Maqedonia se nuk jeni gati. Ne nuk po flasim për tu bërë anëtarë, por për të çelur bisedimet e anëtarësimit. Na u dha me shkrim çfarë duhet të bënim dhe komisioni evropian tha që i keni përmbushur. KE ka njerëz që merren me Shqipërinë dhe flasin me fakte, ndërsa të tjerët flasin çfarë shkruhen në gazeta, por na duhet të bashkëjetojmë me këtë”.