Rama intervistë për CNN: Pengesa për evakuimin e afganëve, lojë brenda Afganistanit

Sërish për median ”CNN”, kryeministri Edi Rama ka folur për strehimin e afganëve në Shqipëri dhe për ”luftën” e talebanëve për të penguar ikjen e tyre nga atdheu. ”Një lojë brenda Afganistanit dhe jo mungesë të vullnetit nga ndonjë palë tjetër”, është ajo që beson Rama sa i takon pengesave për evakuimin e shtetasve afganë në Shqipëri.

“Qysh prej një jave nisëm të bashkëpunojmë me miqtë tanë të angazhuar në këtë operacion, çdo ditë del nga një gjë ere. Askush nuk e kupton dot se ku është problemi. Kemi bërë për këta njerëz atë që kemi bërë edhe për të tjerët mesa duket ky aeroport është problematik por nuk mund të spekuloj se ku qëndron problemi, por nuk do të habitesha nëse kjo do të ishte një lojë e talebanëve që ç’thonë sot e ndryshojnë nesër”.

Po ashtu Rama njoftoi se talebanët nuk do të lejojnë largimin e njerëzve pa pasaporta, ku edhe fëmijët bëjnë pjesë në këtë kontingjent. Sipas tij kjo do të çonte në një fazë të re pengesash.

“Lajmi i fundit është që e kanë ndryshuar fjalën që do të lejojnë vetëm njerëzit me pasaporta, por fëmijët nuk kanë pasaporta dhe historia do të hyjë në fazë të re pengesash e ngecjesh. Ata që duhet të flasin me talebanët duhet të kenë kompetencën dhe trysninë për të folur. Ajo që po bëjmë është të jemi në kontakt me miqtë tanë që janë të angazhuar me këtë nismë njerëzore për të shpëtuar jetën e njerëzve të ekspozuar. Kam prirjen të besoj që kjo është një lojë brenda Afganistanit dhe jo mungesën e vullnetit nga ndonjë palë tjetër”.