Rama kundër gazetarëve, thumbon Zhejin, Mero Bazen, Mark Markun, Rudinën dhe Vasilin

Kryeministri Edi Rama e quan si një çështje artificialisht të nxehur, reagimin dhe protestën e gazetarëve që kanë dalë kundër paketës ”Antishpifje”, edhe pse ndërkombëtarët dhe Europa kanë shprehur rezerva për këtë ligj. Teksa foli për tërmetin, në fjalën e tij në Kuvend, Rama tha se jemi përballë një turme që nuk lexon, ndërsa mori shembujt e vendeve të tjera të BE-së, që shpifja dhe fyerja përbëjnë vepër penale. ”Së pari që ta marrin vesh të gjithë se këtu jemi përballë një turme që nuk lexon dhe nuk denjon të lexojë dhe madje e thotë se nuk na intereson së çfarë thotë ligji. Sipas një raporti të OSBE në 3/4, pra në 42 shtete fyerja dhe shpifja është vepër penale”.

Rama sulmoi gazetarët duke thënë se gazetarët janë shkelës të të drejtave të njeriut. ”Gjithë kjo punë e bërë, gjithë entuziazmi ynë për një ligj që i referohet këtyre shteteve ndeshi në pengesën e BE dhe OSBE, KiE në formën e një fjalie: Mos ju referoni këtyre shteteve sepse i kanë ligjet e ashpra. Nëse ligji gjerman do të kishte subjekte ata që janë të dera e parlamentit ata sot do ishin të gjithë me borxhe për të paguar detyrimet si rezultat i shkeljes së të drejtave të njeriut. Ata janë shkelës së të drejtave të njeriut”.

Nga foltorja e Kuvendit, Rama ka përmendur emrat gazetarësh, si Artur Zhejin dhe Mark Markun, që sipas tij shpifin. Ai foli edhe për organizata të rreme që ngrejnë kauza për të tërhequr vëmendjen e ndërkombëtarëve, kur në të vërtetë sipas tij qëndrojnë vetë gazetarët. Për këtë dha shembullin e Mero Bazes, botuesit të gazetës ”Tema”.”Si organizatat e Mero Bazes, që e ka edhe ai që e përdor për të ngritur ndonjë çështje, se kur e shohin ata andej që organizata po ankohet nuk shohin kush është organizata po ngrihen për të mbrojtur lirinë. Organizata të rreme si profilet false në Facebook. Apo si ata që dalin tek Rai3 dhe flet për burgjet që janë mbushur me gazetarë, për censurën dhe hatanë që bëhet këtu. të censuruar janë ata që kanë të drejtë”.

Pjesë nga deklarata e plotë

S’kemi mundësi që t’ju themi të gjithë atyre që lexojnë shpifjet sesi është versioni i të vërtetës. Por dhjetëra sipërmarrës që detyrohen t’i paguajnë. Por si? Duke pritur siç pres unë gjyqet, ndërkohë që biznesi i tyre derisa të ketë mbaruar gjyqi të ketë falimentuar. Me djathin me miell dhe bukën me niseshte? Le të kthehemi tek përmbajtja. Së pari, kush thotë që ky është një akt unilateral i qeverisë, gënjen. Kjo është një paketë, e konsultuar 1 vit rresht. Unë kam patur kontakt edhe me Këshillin e Evropës, dhe iu kam thënë që ju se keni lexuar ligjin dhe jeni nën presionin e organizatave të rreme, si ajo organizata e rreme e Mero Bazes, se ka edhe Mero një organizatë të rreme, që e përdor hera herës për të ngritur çështje për shtypin e lirë. Apo ai që del tek Rai 3 dhe flet për dhjetëra të arrestuar në burgje.

Gra dhe vajza që hidhen në tezgën e këtyre, që i bëjnë këta prostituta, këta. Punonjës të shtetit që i bëjnë oligarkë këta. Dhe kjo, s’është cështje opinionesh, se deri më dje si ka shkuar mendja njeriut t’i ndalojë këta kur shkojnë edhe në fyerjet më ekstreme. Kjo është kufizimi për të shpifur, për t’ju treguar njerëzve qindra milionat e mia në offshore, qindra pallatet e mia në Spanjë, etj, etj, që o duan të më largojnë mua në jetën publike, o të demaskohen. Dëgjoj Rudina Hajdarin që flet, dhe harron Rudina veten e vet. Ishte vajza e heroit kur mendonte si Partia, ditën kur bëri siç mendonte vetë, e pa vetë. Cila liri? Liria për të thënë u korruptove, vodhe? Këto janë akuza, dhe për këto akuza duhet të përballen, dhe ndëshkimi në këtë ligj është qesharak. Shikoj atë Peçi Vasilin, del Peçi për lirinë e shprehjes, në 7 fjalë, 6 i ka shprehje.

Po bëjmë ligj ne të mbrojmë veten nga Peçi Vasili që del bashkohet me këta. Artur Zheji, e bëri vajzën tonë dashnore të ministrit dhe thotë do largohem nga Shqipëria. E dënoi dhe gjykata, kjo s’është për mua. Unë me këta mbijetoj dhe 100 vite të tjera, por kjo është për shoqërinë për të lehtësuar koncetratin e helmit që këta hedhin në gjakun e shoqërisë nga mëngjesi në darkë. Një tjetër është Mark Marku, që nuk lë fjalë të ndyrë pa i thënë një deputeti që e kërcënon se do t’a qëllojë me shishe. Ky është profesori i lirisë, Mark Marku, që duhet markuar me të kuqe, por ky ligj s’është për deputetin që të cojë pedagogun se iu shthur goja. Por që publiku të mësojë atë që thuhet, se a jemi të gjithë njësoj?

Se të gjithë ata që merren me politikë, të kenë atë turmë atje mbi vete? Apo secili ka të drejtën të kërkojë llogari publike për atë që i thuhet? Përca po flasim këtu? Ku po cënohet liria e shprehjes këtu? Kur kam dhënë një intervistë për revistën “New Yorker”, ka zgjatur 1 muaj, pasi gazetarja më të njohura të Amerikës, dorëzoi intervistën, pasi departamenti i merrte të gjithë në telefon, se nëse atë ditë që referohej kryebashkiaku, kishte veshur fustan të kuq.