Rama: Ky fundvit tregoi se në ç’gjendje të mjerë është sistemi energjitik

Kryeministri Edi Rama ka thënë se moti i keq gjatë festave të fundvitit nxori edhe njëherë në pah se në ç’gjendje të mjerë është katandisur sistemi energjitik në shqipëri.

Për këtë arsye ai ka kërkuar nga qytetarët që të paguajnë energjinë elektrike sot, në mënyrë që të sigurojnë të nesërmen.

“Të paguash energjinë sot do të thotë të investosh për nesër!

Për veten dhe për vendin. Kush nuk ka lidhur ende marrëveshje, të mos e humbasë ofertën lehtësuese deri në 28 shkurt. E pamë të gjithë se si moti i rënduar i fundvitit nxorri në dukje edhe njëherë, kudo nëpër Shqipëri, gjendjen e mjerë ku është katandisur në njëzet vjet sistemi i shpërndarjes së energjisë. Si mund të ishte ndryshe pas njëzet vjetësh vjedhje pafund dhe investime me pikatore!…”

Duke u kthyer në rrugën e ligjit, duke ulur vjedhjet, rritur arkëtimet dhe nisur investimet reale në rrjet, kemi filluar një ndryshim vërtet historik. E sa më shpejt t’i japim fund vjedhjes dhe mospagimit korrekt të energjisë, aq më parë do të

kemi jo vetëm një rrjet shpërndarjeje të rimëkëmbur, po edhe mundësi të reja për investime në sektorët e tjerë. Më shumë për arsimin, shëndetësinë e me radhë, me paratë që deri sot kanë shkuar për të mbuluar gropën e hajdutërisë çmendurake që zgjat prej dy dekadash – Jo pak, 150 milionë euro çdo vit! Kurajo!”, shkruan Rama.