Rama në Preshevë: Asnjë pengesë për njohjen e diplomave

Gjatë vizitës në serbi, kryeministri Edi Rama ka zhvilluar një vizitë dhe në Luginën e Preshevës, ku ka diskutuar mbi nevojat e shqiptarëve që jetojnë aty.

Në këtë takim Rama ishte i shoqëruar dhe nga deputeti shqiptar i parlamentit serb, Riza Halimi, ku theksoi se qeveria shqiptare ka hequr çdo pengesë për njohjen e diplomave të studentëve të luginës së Preshevës.

“Po zhvillohet dhe infrastruktura që do të prekë pozitivisht Luginën e Preshevës. Duhet të formalizojmë binjakëzimin me bashkitë tona, duke u mbështetur te rilindja urbane në Shqipëri”, tha Rama, duke shtuar se këto zhvillime për përfaqësuesit e Luginës konsiderohen pozitive.

Kryeministri shqiptar tha se homologu i tij serb, Aleksandër Vuçiç, është angazhuar për një proces që ka shumë hije të së shkuarës për t’i lënë pas.

“Do të vazhdojmë me vullnet të plotë të promovojmë ndërtimin e urave mes shqiptarëve të Luginës dhe Shqipërisë”, përfundoi kryeministri i Shqipërisë.