Rama në Qafë Thanë: Synojmë unifikimin e doganave me Maqedoninë e Veriut

Nga Qafë Thana, ku së bashku me homologun Kovaçevski mori pjesë në ceremoninë e inaugurimit të programit të ri kufitar “Një ndalesë – Një kontroll” mes Shqipërisë dhe Maqedonisë së Veriut, Rama tha se me këtë nismë synohem unifikimi i doganave me shtetin fqinj.

“Ky është një moment i rëndësishëm për të gjithë ata që kalojnë nga kjo pikë kufitare, qofshin individë apo kompani që shkëmbejnë mes dy vendeve. Është një moment i rëndësishëm sepse më në fund ua lehtësojmë në mënyrë të konsiderueshme kalimin në këtë pikë dhe patjetër i japim një shtysë të mëtejshme jo vetëm shkëmbimeve tregtare, por edhe zhvillimit të marrëdhënieve tona në tërësi pa harruar edhe zhvillimin e turizmit”, tha kryeministri Rama i pranishëm në ceremoninë e organizuar sot në pikën kufitare të Qafë Thanës.

Shqipëria këtë vit po përjeton një fluks të madh të turistëve dhe kjo nismë është pjesë e rë për transformimim në funksion të lehtësimit të kalimit të kufijve.

“Shqipëria këtë vit po përjeton impakt të jashtëzakonshëm të transformimit të saj. Si asnjë vit më parë fluksi i turistëve, por dhe numri i investitorëve të mëdhenj ndërkombëtarë te interesuar për të investuar në industrinë e turizmit në Shqipëri, së bashku me shqiptarët e diasporës apo dhe me ata që banojnë në Shqipëri është realisht tejet inkurajues” tha kryeministri Edi Rama.