Rama në Shijak, nis dëgjesat publike për rindërtimin

Këtë të shtunë, në orën 11:00 do të mbahet një dëgjesë publike për rindërtimin dhe planet e zhvillimit të Shijakut pas tërmetit të 26 nëntorit dhe mbledhjes së 1.15 miliardë euro fonde në Konferencën e Brukselit. Takimi i parë ishte në Thumanë, ndërsa në vijim të procesit transparent, dëgjesa e dytë publike për Shijakun do të mbahet në ambientet e palestrës së shkollës “Muharrem Dollaku”.

Familjet që kanë pësuar dëme nga tërmeti po i afrohen mundësisë për të pasur një shtëpi të re. Ministri i Rindërtimit, Arben Ahmetaj, dje në një konferencë për shyp, tha se javën e ardhshme hapet tenderi ndërkombëtar për ndërtimin e 3400 banesave. ”Javën që vjen shpallet gara ndërkombëtare nga të dy njësitë e mësipërme, Bashkia Tiranë dhe Fondi Shqiptar i Zhvillimit, për 3400 shtëpi individuale”.

Nga ana tjetër, Ahmetaj njoftoi gjithashtu se fondi i alokuar nga buxheti i ministrisë është 8.7 mld lekë. Fondi i Zhvillimit do të ndërtojë 2500 banesa, ndërsa Bashkia Tiranë do të ndërtojë 889 shtëpi. Ministri Ahmetaj garanton se banesat do të ndërtohen me teknologji modulare. Parimi i solidaritetit është baza e rimëkëmbjes nga qeveria sipas Ahmetajt. ”Dua të theksoj në një fjalë çelës, shtëpitë janë falas”.