Rama: Në tre muajt e fundit të 2014-s, u punësuan 82 mijë persona

Kryeministri Edi Rama shprehet entuziast në lidhje me shifrat e punësimit.

Ai thotë se vetëm brenda tre muajve të fundit të 2014-s, janë punësuar 82 mijë persona.

Rama i referohet Anketën e Forcave të Punës, të përgatitur nga INSTAT.

“Disa të dhëna tejet inkurajuese të tremujorit të katërt të 2014 sipas INSTAT:

Numri i të punësuarve është rritur me 82.629 persona.

Numri i personave në moshë 15-64 vjeç jashtë tregut të punës ka rënë me 105.113.(Shenjë e qartë e rritjes së besimit dhe shpresës se gjendet punë)

Në terma vjetorë, punësimi u rrit me 8,5 % krahasuar me tremujorin e katërt të vitit 2013.

Industria përpunuese, aktivitetet e shërbimeve të tregut dhe sektori i ndërtimit patën rritjen më të ndjeshme të të punësuarve me përkatësisht 27,4 %, 14,8 % dhe 14,6 %.

Shkalla e punësimit është më e lartë për të punësuarit me arsim profesional (65,5 %), pasuar nga ata me arsim të lartë (64,9 %),” shkruan Rama.

Vetëm se ka shumë diskutime për shifrat.

Kjo, duke qenë se mendohet se një pjesë e këtyre personave kanë qenë të punësuar, por thjesht janë siguruar, për shkak ashpërsimit të masave të qeverisë për kompanitë që nuk sigurojnë punonjësit dhe skemës së re të pensioneve.