Rama nuk i pezullon faturat e dritave. OSHEE don lekë!

Edi Rama do paguajë çfarë duan oligarkët, por faturat e dritave të popullsisë nuk do ti stopojë apo shtyjë sa të kalojë emergjenca.

Kryeministri Edi Rama deklaroi sot se nuk ka ndërmend të pezullojë pagesat e faturave të ujit dhe dritave në këtë kohë krize.

Sipas tij, ky vendim do e çonte në gropë Operatorin e Shpërndarjes së Energjisë.

“Ne mezi e kemi ngritur atë sektor nga gërmadhat se duhet për sot e për nesër, për në mars, prill, qershor e për në korrik e shtator. Nëse ne vendosim që mos paguhet energjia, atëherë vendosim që ta bëjmë Shqipërinë black out pas disa muajsh sepse e çojmë kompaninë e shpërndarjes në pamundësi likuiditeti përshembull,” tha Rama.

Por kryeministri harroi të tregonte përpara shqiptarëve se ai e ka çuar në gropë këtë sektor që përpara se të vinte kjo krizë.

Kështu, edhe pse paguajmë çmimin më të lartë të energjisë në rajon, në fillim të këtij viti u raportua se OSHEE e ka mbyllur vitin 2019 me rreth 64 milionë dollarë humbje. Po si do ti paguajnë pensionistët faturat e dritave kur nuk i lejon as të dalin.

Sipas një raporti të INSTAT, ‘humbjet joteknike’ të OSHEE janë rritur me 13 përqind gjatë vitit të shkuar.