Rama: Pa ambasadorët nuk bëjmë dot gjë…!

Kryeministri Rama ishte sot pasdite në Shkodër, për të marrë pjesë në inagurimin e muzeut të fotografisë “Marubi”. Nisur edhe nga konteksti aktual për rolin e ambasadorëve në miratimin e reformës në drejtësi, Rama nuk i kurseu batutat për ta.

Duke e konsideruar Shkodrën e atëhershme si një qytet të rëndësishëm ekonomik dhe tregar, Rama tha se edhe ambasadorët Lu e Vlahutin do ta kishin zgjedhur këtë qytet për të zhvilluar aktivitetin e tyre parti më parti.

“Pse Pjetër Marubi erdhi në Shkodër? Pse saga e Marubëve nuk mund të kishte asnjë skenë tjetër përveç Shkodrës? Sepse ishte një qytet i rëndësishëm ekonomik, qytet i rëndësishëm tregtar…që edhe Romana dhe Lu do ta kishin zgjedhur për të zhvilluar këtu aktivitetin e tyre konsullatë më konsullatë, e parti më parti. Prit të vijnë edhe ambasadorët se ne pa ambasadorët nuk bëjmë dot gjë….” tha Rama.