Rama: Shqipëria, anëtare e qendrës europiane të ekselencës kundër kërcënimeve hibride në Helsinki

Shqipëria është anëtare e Qendrës Europiane të Ekselencës kundër Kërcënimeve Hibride në Helsinki. Kryeministri Edi Rama, thotë se anëtarësimi kompleton pjesëmarrjen e të gjitha vendeve të BE dhe NATO në këtë organizatë.

Kreu i qeverisë nënvizon edhe se kështu mundësohet një qasje e unifikuar mes aleatësh kundër kërcënimeve hibride, Dizinformimit dhe Manipulimit të Informacionit nga Shtetet e Huaja. Anëtarësimi u nënshkrua nga ministri për Evropën dhe Punët e Jashtme, Igli Hasani, i cili ndodhet për një vizitë zyrtare në Finlandë. Hasani vizitoi Qendrën Evropiane për Kërcënimet Hibride në Helsinki.

Bashkëpunimi në sektorin e ekonomisë dhe turizmit, mbështetja e Finlandës ndaj procesit të integrimit të Shqipërisë në BE, mbështetja për Ukrainën si dhe bashkëpunimi në kuadër të NATO-s dhe kryesinë e OSBE-së për vitin 2025, janë disa prej temave që diskutoi gjatë takimeve ministri Hasani.