RAMA:LINJË E RE ENERGJIE PËR JUGUN PAS 45 VITESH

 

 

Nga Edi Rama.

 

Në Sarandë për punimet e ndërtimit të linjës së re 20 kv dhe të rrjetit te kabinave të reja elektrike, falë investimit të OSHEE, i pari pas 45 vitesh në rrjetin e lënë paprekur që prej ndërtimit të tij në kohën e elektrifikimit të Shqipërisë. Linja e dikurshme ajrore 10 kv, krejtësisht e amortizuar dhe e pafuqishme për të mbajtur ngarkesën e shtuar nga zhvillimi urban i çerekshekullit të fundit, po zëvendësohet nga linja e re 20 kv. E futur e gjitha nëntokë për një shërbim me energji pa ndërprerje dhe më cilësor për banorët, por edhe për vizitorët e shumtë në këtë zonë turistike ku gjenden mbi 700 hotele dhe restorante, kjo linjë hap rrugën për t'i dhënë fund makthit të shërbimit të mjerueshëm me energji të kësaj zone strategjike për zhvillimin ekonomik të Shqipërisë.

OSSHE po investon në Sarandë dhe kudo, kur deri përpara një viti, jo vetëm që nuk bënte dot asnjë investim, por thithte 150-200 milionë dollarë nga arka e shtetit për të mos fikur dritat në gjithë vendin. Sot, falë reformës rrënjësore në energji dhe kontributit të konsumatorëve që paguajnë rregullisht energjinë elektrike, kompania jo vetëm që po investon, por edhe kontribuon me taksa në arkën e shtetit, që i kthehen prapë qytetarëve në shërbime dhe investime.