Reforma/ Si do funksionojnë institucionet e drejtësisë me ligjet e reja

Miratimi të enjten në Kuvend i paketës me 6 ligjet prioritare do t’i hapë rrugën zbatimit të reformës kushtetuese për ngritjen e institucioneve të reja të sistemit të drejtësisë në Shqipëri.

Pas miratimit më 30 gusht të ligjit të Vetingut, vetëm me votat e maxhorancës, tashmë pritet miratimi i pr/ligjeve të tjera, të hartuara me mbështetjen e misioneve ndërkombëtare, EURALIUS dhe OPDAT. Vetëm për një nga draftet, ligjin e SPAK-ut, opozita ka dhënë mbështetjen e saj, ndërsa ka refuzuar miratimin e 5 projektligjeve të tjera.

Përcjellja në parlament e paketës ligjore është shoqëruar dhe me miratimin nga qeveria të faturës financiare të reformës në drejtësi, e cila përllogaritet në rreth 1.8 miliard lekë ose afërsisht 14 milion e gjysëm dollarë. Kjo faturë i përgjigjet pagave të reja të gjyqtarëve dhe prokurorëve dhe funksionimit të institucioneve të reja të sistemit të drejtësisë.

Projektligjet e reformës

Pr/ligji “Për organizimin dhe funksionimin e institucioneve për të luftuar korrupsionin dhe krimin e organizuar”, SPAK

Objekti i këtij ligji është përcaktimi i rregullave për organizimin dhe funksionimin e Prokurorisë së Posaçme dhe njësisë së pavarur hetimore, të krijuara nga neni 148, paragrafi 3 i Kushtetutës. Drafti përcakton kushtet shtesë që duhet të përmbushin prokurorët për t’u emëruar në Prokurorinë e Posaçme, si dhe kushtet dhe procedurat shtesë për zgjedhjen e një Drejtuesi të Prokurorisë së Posaçme, ndërmjet prokurorëve të emëruar në Prokurorinë e Posaçme. Pr/ligji përcakton mes të tjerash dhe kushtet që duhet të përmbushin shtetasit për të qenë oficerë dhe punonjës në njësinë e pavarur hetimore, si dhe kushtet për të qenë punonjës në gjykatat kundër korrupsionit dhe krimit të organizuar dhe në Prokurorinë e Posaçme.

Pr/ligji “Për organizimin dhe funksionimin e Prokurorisë në Republikën e Shqipërisë”

Objekti i tij është përcaktimi i rregullave të organizimit dhe funksionimit të Prokurorisë në Republikën e Shqipërisë, si dhe kushtet që duhet të përmbushin shtetasit që të emërohen prokurorë. Gjithashtu ai përcakton statusin e prokurorit; karrierën dhe procedimin disiplinor të prokurorit; marrëdhëniet e Prokurorisë me institucionet e tjera shtetërore, etj.

Pr/ligji “Për organet e qeverisjes së sistemit të drejtësisë”

Ky pr/ligj përcakton parimet dhe rregullat në lidhje me organizimin dhe funksionimin e Këshillit të Lartë Gjyqësor, të Këshillit të Lartë të Prokurorisë, të Inspektorit të Lartë të Drejtësisë, të Këshillit të Emërimeve në Drejtësi, si dhe të Shkollës së Magjistraturës.

Pr/ligji “Për organizimin e pushtetit gjyqësor në Republikën e Shqipërisë”

Ky ligj përcakton krijimin, organizimin dhe kompetencat e gjykatave, kushtet dhe procedurat për emërimin e gjyqtarëve të gjykatave të shkallës së parë dhe të apelit, të drejtat dhe detyrimet e gjyqtarëve, masat disiplinore dhe shkarkimin e tyre, si dhe çështje të tjera të lidhura me funksionimin e gjykatave.

Për statusin e gjyqtarëve dhe prokurorëve në Republikën e Shqipërisë

Objekti i këtij ligji është të përcaktojë statusin e magjistratëve dhe ndihmës-magjistratëve, duke parashikuar rregulla për të drejtat dhe detyrimet e tyre; kriteret dhe procedurën për pranimin dhe emërimin; per zhvillimin e karrierës dhe mbarimin e mandatit; kriteret për vlerësimin etik dhe profesionale të tyre etj.

Projektligji “Për Gjykatën Kushtetuese”

Risi kryesore e ketij ligji eshte zgjedhja e anëtarëve të këtij institucioni, përmes një formule të re.