Replika të ashpra të Berishës me Ballën dhe Sterkajn

Sali Berisha sulmoi sot në Kuvend Taulant Ballën duke i thënë “Rri urtë ti, ti mbylle gojën, se nuk pyes unë as për horra, e as për të fortë”.

Në atë pikë ndërhyri Shpëtim Idrizi, i cili sqaroi se Balla po fliste me të. Por menjëherë më pas pati replika në sallë mes Berishës dhe Sterkajt: “Shko qëllo me ndonjë revole në QV ti”, – iu drejtua Berisha deputetit socialist të Malësisë së Madhe.

Kur mori fjalën në foltore, Sterkaj iu përgjigj: “Nuk e kam përdorur pistoletën as kur kam qenë polic, e jo tani që jam deputet i nderuar në atë rreth”.

Kur mori fjalën Balla, përgjigjet ndaj Berishës qenë të shumta: “Berisha kërkonte ndaj sekretarit të parë të parttisë së punës, merrni masa ndaj familjeve të atyre që duan të ikin me ambasada. Sot bën a thua i dhemb shpirti apo zemra dhe flet me mirënjohje për ata që 25 vjet më parë i shante dhe i cilësonte si tradhtarë të partisë”, – tha Balla.

Më pas Balla tregoi një ndodhi personale nga zgjedhjet e së shkuarës. “Kam qenë komisioner në Librazhd, ku dhe votoja për herë të parë. Në orën 14.00 të ditës së votimit një pjesë e komisionerëve të PS u largua nga QV, unë qëndrova aty. Erdhi një furgon policie, 4 policë trup-mëdhenj në qendër të votimit më drejtohen: po t’i more qen pse nuk ikën nga qv, më morën në furgon për leckash, më plasën në rajon. I fundit që mund të flasë për standarde zgjedhjesh në këtë vend ëhstë Sali Ram Berisha. Kështu i bënte zgjedhjet Berisha, të fuste një shkop gome kurrizit dhe kutitë u numëronte ai vetë”.

Lidhur me çështjen e Beketit dhe Agon Channel, Balla theksoi: “Si ka mundësi që një ish-president dhe ish-kryeministër sulmon Deutsche Bank dhe mban anën e një shkelësi gjobaxhi të paparë. Shpresoj ta kenë dëgjuar gjermanët që ta hedhin në gjyq për shpifje”.