Rikthehet Arben Malaj, ish-ministri socialist i Financave në krah të Agron Dukës dhe përballë Ramës

Një muaj pasi i shkarkua nga Kuvendi nga posti i anëtarit të Këshillit Mbikqyrës të Bankës së Shqipërisë, ish-ministri socialist i Financave Arben Malaj “mban” premtimin duke u rikthyer në politikë.

Dhe ashtu siç kishte paralajmëruar Malaj ka vendosur të përballet në të ardhmen me “armikun” e tij më të madh Edi Ramën, duke u rreshtuar tashmë në radhët e opozitës së bashkuar.

Malaj ka vendosur që të jetë pjesë e Partisë Agrare Ambientalist, që drejtohet nga një tjetër ish-ministër socialist, Agron Duka.

Lajmin për bashkimin e tij në krah të Dukës e ka bërë me dije vetë Arben Malaj, i cili përmes rrjeteve sociale thekson se e ka mirëpritur ftesën e kolegut të tij për Duka për të kontribuar si këshilltar strategjik për platformën dhe organizimin e PAA-së për zgjedhjet e ardhshme parlamentare dhe lokale.

Njoftimi i Arben Malajt

Nje angazhim konkret me Partine Agrare Ambjentaliste. E mireprita ftesen e kolegut te nderuar Agron Duka per te kontribuar si keshilltar strategjik per platformen dhe organizimin e PAA per zgjedhjet e ardhshme parlamentare dhe lokale . Keshillimi i kesaj partie te qendres se majte, me strategji te sukseshme, me krijon mundesi reale per te dhene kontribute pozitive per ta rritur fuqine elektorale te PAA dhe per ta ofruar PAA ne cdo aspekt te vlerave dhe misionit te saj politik me te gjelberit evropian, te cilet vleresohen sot si grupimi politik me progresiste dhe me influence te rritur ne qeverisjen vendore dhe kombetare ne shume vende te BE-se, por edhe ne institucionet e saj politike. Te gjelberit ne zgjedhjet e fundit per parlamentin evropian fituan rreth 10 perqind te votave, duke marr nje status te rendesishem edhe per politikat ne nivel evropian. Suksese PAA! Mirenjohje cdo kolegu qe do te angazhohet per sfidat e PAA, si nje mundesi konkrete per zhvillime dhe ndryshime pozitive ne Shqiperi! Arbeni!

Deklaratat e fundit ne Kuvend

Arben Malaj, ish-deputet, ish-ministër i PS-së për disa vite, me 18 dhjetor 2019 u përball me kolegët socialistë në Parlament, pasi Edi Rama ka propozuar shkarkimin e tij nga Këshilli Mbikëqyrës i Bankës Shqiptare.

Përpara se të bëhej votimi, Arben Malaj ka mbajtur një fjalim “himn”, duke deklaruar se deputetët po vendosen në rresht, gjë që s’ka ndodhur as në 1992. Ai deklaroi se po shkarkohet vetem se ka guxuar të thotë fjalën e lirë. Fjalën e lirë për keqqeverisjen e vendit nga Kryeministri Rama.

Ai e quajti “goditje pas shpine”, atë që po bën Rama. Ndërsa për kreun e Parlamentit, Gramoz Ruçi u shpreh se “me votimin për shkarkimin e tij në parlament po e mbyll karrieren politike me turp”.

“Korrupsioni dhe kapja e shtetit vret më shumë se termeti. Kostot financiare ndihen në jetën e shqiptarëve, në pasigurinë e tyre për të ardhmen. Një aksiomë thotë “pushteti absolut korrupton në mënyrë aboslute”. Asnjë bankë qendrore nuk ia del të mirëmbajë financat kur atmosfera politike është acid.

Nëse institucionet kushtetuese nuk funksionojnë, nëse vendi keqqeveriset atëhere pushtetarët kanë vetëm një qëllim: Pasurimin personal.

Kërkesa për heqje imuniteti kanë ardhur edhe dy herë të tjera në këtë parlament por kanë dështuar. Heqja e imunitetit dështoi në vitin ’92 kur deputetët me integritet refuzuan ti heqin imunitetin Rulit dhe Rukës. Në vitin 2004, PS-ja shpëtoi nga njolla kur vendosi të mos i heqë mandatin e deputetit Nikoll Lesit.

Sot Rilindja po më bën një gjyq politik. Ky është një turp në historinë e parlamentarizmit. Në vitin 2019 deputëtët e PS ndjehen të frikësauar nga Rama i cili po mbjell frikë kudo dhe po rrezikon ta kthejë vendin në neodiktaturë.

Duke shfrytëzuar gjithçka negative ju Shoku Rama arritët të bëheshit kryetari i rilindjes në PS dhe kryeministër i Shqipërisë. Por siç thotë Ezopi krushqia me njerëzit e ligj përfundon gjithmonë keq siç është duke përfunduar në mënyrë dështuese epoka juaj e drejtimit të Rilindjes dhe Shqipërisë.

E majta ka shumë personalitete që mund ta qeverisin Shqipërinë shumë më mirë sesa ju por dehja nga pushteti abuziv ju mban të lidhur siç mban droga të droguarit. Në jetë janë disa gjëra që nuk janë për shitje, integritetin tim nuk e kam ofruar për shitje.

Unë e kam kryer me korrektesë detyrën si anëtar i Këshillit Mbikëqyrës së BSH-së. Shkarkimi im është vetëm një hakmarrje personale e Edi Ramës”, u shpreh ndër të tjera Arben Malaj.