Rubla ruse apo para krimi? Krasniqi: Asnjë palë nuk ka vullnet për Reformën Zgjedhore

14 maji 2023 afron shpejt, dhe si në çdo palë zgjedhje, qofshit lokale si vitin e ardhshëm, apo edhe ato të përgjithshme, është akuzat gjithmonë për blerje me para krimi, ose rubla ruse siç akuzon tashmë qeveria PD-në, kjo për kohën kur drejtues ishte Lulzim Basha. Financimi i partive politike është thembra e Akilit në Reformën Zgjedhore. Komisioni i Posaçëm Parlamentar po shkon drejt mbylljes së gjysmës së mandatit, kjo pa asnjë produkt konkret që për analistin Afrim Krasniqi tregon mungesën e vullnetit, për një çështje të mprehtë që kërkon zgjidhje.

“Problemi është që para që marrin nga shteti janë vetëm minimumi i mundshëm, financimi kryesor vjen nga burime informale. Ne shohim që kapen laboratorë droge. Për çfarë janë ato? Praktikisht janë një nga metodat e financimit në fushatë elektorale. Shohim që individë që përbejnë grupe kriminale vazhdojnë të kenë lidhje politike dhe ato janë burimi kryesor i financimit elektoral. Për këtë do të duhet të kishte një reformë zgjedhore!”, thotë Krasniqi për ”A2cnn”.

Në zgjedhjet e fundit parlamentare u zbatua për herë të parë mekanizmi i kontrollit të pushtetit qendror në fushatë elektorale, ku katër muaj para datës së zgjedhjeve, qeverisë i ndalohet propaganda me punët e bëra. A do të mund të zbatohet ky mekanizëm edhe në rastet e kryetarëve të bashkive që synojnë një mandat tjetër?

“Kryetarët e bashkive të cilët kandidojnë në fushatë elektorale, do të duhet që gjatë fushatës ta delegojnë detyrën te nënkryetarët në mënyrë që të mos jetë i njëjti individ që përdor bashkinë, punonjësit, tenderat, klientelën dhe gjithçka në dispozicion të fushatës së tij elektorale”, thotë Krasniqi.