Rudina Hajdari flet me ambasadoren amerikane dhe jep mesazhin se ndryshimet e Kodit Penal janë antikushtetuese

Deputetja Rudina Hajdari ka publikuar një video-konferencë me ambasadoren e SHBA në Tiranë, Yuri Kim.

“Kënaqësi të bashkëbisedoja nëpërmjet video-konferencës me Ambasadoren amerikane Znj. Yuri Kim, mbi situatën e tanishme në Shqipëri.  E informova për gjendjen e vështirë në të cilën ndodhen shumë familje shqiptare, realitet të cilin e kam prekur këto ditë teksa jam munduar të ndihmoj sado pak këto familje në nevojë.

Gjithashtu shpreha shqetësimet e mia për gjendjen emergjente nga COVID-19, mbi ndryshimet e Kodit Penal, të cilat janë të panevojshme e sidomos përmenda faktin se këto ndryshime cenojnë Kushtetutën dhe Konventën Europiane për të Drejtat e Njeriut.  Gjeta rastin të falenderoja ambasadoren për kontributin e SHBA-së, me pajisje personale të mbrojtjes nga programi për Asistencë Humanitare i Komandës Europiane të Shteteve të Bashkuara në mbrojtjen e punonjësve të shëndetit në vijën e parë të luftës kundër COVID-19”, shkruan Hajdari.

Rudina Hajdari është vajza e Liderit të Dhjetorit 1990, Azem Hajdarit. Ajo ka ruajtur sharmin e babait, i cili shquhej për patriotizëm dhe shpirt demokrat.

Rudina Hajdarit po insiston se ndryshimet në Kodin Penal që kërkon kryeministri për të ndëshkuar qytetarët të cilët shkelin rregullat e koronavirusit, janë antidemokratike. Nëse ajo vendos ti rrëzojë me krejt deputetët e opozitës parlamentare, ajo do të hyjë në histori.

Ndërkohë Ulsi Manja, Taulant Balla dhe kryeministri po bëjnë presion mbi deputetët e opozitës që ti miratojnë ndryshimet në Kodin Penal.

Publikimi i bisedës me ambasadoren (gjë që nuk lejohet pa lejen e palës amerikane) tregon se vetë ambasada amerikane mbetet e interesuar të jap mesazhin se ndryshimet në Kodin Penal nuk janë të pranueshme nga ana e tyre.