Samiti i Ballkanit Perëndimor në Tiranë, Nesho: Përpjekje për të gjetur vetveten

Dje Tirana u bë kryeqendër e Ballkanit Perëndimor. Në fjalën e tij komisioneri Varhelyi konfirmoi angazhimin e Bashkimit Europian për mbështetje të fortë ekonomike për të gjithë rajonin, që shkon deri në 30 miliardë euro. Sipas diplomatit Agim Nesho, ish-ambasador i Shqipërisë në OKB, optimizmi nuk duhet të zbeh problematikat.

”Jemi larg nga anëtarësime të reja, sepse detyrat e shtëpisë këto vende nuk i kanë kryer, përfshirë këtu Shqipërinë. Por ka një moment, sepse vetë BE e sheh si një zgjidhje gjeopolitike integrimin e Ballkanit në bashkësinë europiane. Kjo është pozitive dhe ky samit ishte më shumë si një përpjekje e liderëve për të gjetur vetveten”, thotë ai.

Sipas tij, këto vende “kanë vite që po tentojnë zgjidhje alternative, projekte të mbivendosura me anëtarësimin si Mini Shengeni, për të treguar që janë një forcë që edhe mund të kundërvihet në qoftë se nuk i jepet vëmendja e duhur”.

Një nga pengesat zyrtare të çeljes së Konferencës së Parë ndërqeveritare është veto bullgare ndaj Shkupit, për një serë arsyesh, kryesisht identitare. Por a jemi peng i Maqedonisë së Veriut në rrugën drejt anëtarësimit?

Disa vite më parë ishte Maqedonia e Veriut peng e Shqipërisë, por Presidenti francez, Emmanuel Macron nuk dëshironte të ndante dy vendet. Ne flasim për vendimmarrjen, që nuk e kemi në dorë, por jo për faktin që nuk plotësojmë kriteret e meritokracisë që të bashkojmë vlerat e Ballkanit Perëndimor me ato të BE-së, ndërkohë që nuk jemi transparent ndaj atyre reformave që kanë dështuar, nga korrupsioni tek krimi i organizuar, që duhen tejkaluar me vullnet por edhe me tejkalimin e klasës politike.