SHBA ka 3 prioritete, Yuri Kim thirrje qeverisë: Prioritet përmirësimi i klimës së biznesit

Ambasadorja e SHBA-së në Tiranë, Yuri Kim u bëri thirrje të gjithëve që t’i japin përparësi përmirësimit të klimës së biznesit në Shqipëri, gjatë mbledhjes së Dhomës Amerikane të Tregtisë me Asamblenë e Përgjithshme. Po ashtu Kim theksoi se SHBA ka 3 prioritete në Shqipëri që janë: demokracia, biznesi dhe mbrojtja.

”Prioritet tona janë mbrojtja, biznesi dhe demokracia. Të gjithë jemi përqendruar prej kohësh në demokracinë dhe mbrojtjen. Jam e kënaqur që po udhëheq ambasadën në një shtysë për të ngritur ekonominë tonë në një nivel.

Shumë mund të përfitohet nga Shqipëria, ekonomi në rritje, qasje në më shumë produkte dhe më shumë mundësi për rininë shqiptare, pikërisht këtu në Shqipëri. Dy javë më parë kemi parë Skavicën, vendin që Shqipëria do të ndërtojë hidrocentralin.

Ky projekt shoqërohet nga një në Vlorë, që është një shembull tjetër i fortë dhe nëse ka sukses do të jetë projekti më i madh në Shqipëri i bërë nga një kompani amerikane. Mbetet ende shumë punë për të bërë. Ne i bëjmë thirrje qeverisë shqiptare që t’i japë përparësi klimës së biznesit.

Reforma në Drejtësi duhet çuar deri në fund, e konkurrenca e ndershme duhet të jetë parësore që të gjithë investitorët të luajnë me të njëjtat rregulla të drejta dhe transparence. Jam e kënaqur që kryeministri e ka parë këtë si mundësi për të përmirësuar klimën e biznesit. Gjatë 30 viteve të fundit kemi bërë rrugë të gjatë, por kur shohim atë që ka ndodhur them se e ardhmja do të jetë më e ndritur”.