Shefqet Kastrati jep 1.5 milionë euro për familjet e dëmtuara nga tërmeti

Biznesmeni i njohur Shefqet Kastrati, i cili është dhe administrator i “Albanian Highway Concession” kompania që menaxhon “Rrugën e Kombit”, në një mesazh publik njofton se që pas tërmetit ka dhënë urdhër që kushdo që sillte ndihma në Shqipëri të mos paguajë taksën e kësaj rruge.

Në mesazhin e tij për qytetarët duke shprehur dhimbjen për viktimat e tërmetit, Kastrati bën me dije se ka dhuruar 1.5 milionë euro për familjet e dëmtuara nga tërmeti.

Mesazhi i plotë i Shefqet Kastratit:

“Tragjedia Shqiptare më ka tronditur thellësisht mua dhe familjen time, bashke me vëllezerit e mi.

Jemi munduar të ndihmojmë e të lehtësojmë sa mundemi këto ditë. Si gjithnjë – pa zhurmë.

E kam dhënë në çast urdhrin e mosmarrjes së asnjë kokërr leku nga askush që ka kaluar nëpër Rrugën e Kombit për ndihmë.

Pa bërë asnjë publicitet, sepse gjithmonë kam ecur me parimin: “Kur ndihmon një rob të Zotit në nevojë, duhet ta shohë veç ai lart!”.

Unë dhe familja ime kemi ndarë 1.5 milionë euro që kjo dhimbje e madhe që të lehtësohet sado pak.  Vendosëm ta bëjmë publik kontributin tonë për familjet e tërmetit vetëm që t’i bëjmë thirrje atyre që kanë më shumë se të tjerët: Kjo s’është dita të kurseje asgjë shqiptari që ka shumë për shqiptarin që ka humbur gjithçka!

Ngushëllime familjarëve që humbën njerëz në këtë katastrofë dhe Zoti i Madh qoftë me Shqipërinë e plagosur!”.