Shqiptarët mbahen ”peng në rrugë”/Reagon Meta, Basha dhe Rama

Në këtë kohë të pandemisë, ku lëvizja e lirë dhe kufinjtë janë mbyllur, dhjetëra qytetarë kanë mbetur të bllokuar në pikat e kalimit kufitare me Greqinë dhe Malin e Zi, pasi kërkojnë të rikthehen në shtëpitë e tye por vendimi i qeverisë për mbylljen e kufijve i ka lënë në rrugë të madhe.

Lidhur me këtë situatë të jashtëzakonshme, ka reaguar e gjithë struktura e shtetit. Presidenti i Republikës, Ilir Meta kërkon bashkëpunimin midis qytetarëve dhe autoriteteve përgjegjëse në këtë situatë të vështirë. Nga ana tjetër, përveç solidaritetit dhe përgjegjshmëri, kreu i shtetit kërkon sa më pak kosto në këtë sfidë të jashtëzakonshme.

Kurse kryetari i Partisë Demokratike, Lulzim Basha i kërkon qeverisë që të lejojë kthimin menjëherë në shtëpi të qytetarëve që prej 48 orësh mbahen ”peng në rrugë”. ”Braktisja e qytetarëve është papërgjegjshmëri çnjerëzore. Asnjë shtet në botë nuk pengon qytetarët e vet të futen në atdheun e tyre dhe të shkojnë në shtëpinë e tyre”.

Kryeministri Edi Rama u ka bërë thirrje qytetarëve të rrinë atje ku janë. ”Mos kërkoni dhe mos tentoni të vini sepse kufiri është i mbyllur. Ne nuk jemi një vend që mund të përballojmë hapjen e kufijve dhe të mbledhim të gjitha bombat këtu ndërkohë që jemi duke iu afruar mesit të kësaj lufte. Ruani veten tuaj dhe familjet tuaja. Rrini atje ku rrini”.