Shuhet Colin Powell, Presidenti Meta. Humbje e madhe, mbështetës i pavarësisë së Kosovës

Ndarjen nga jeta e ish-sekretarit amerikan, Colion Powel për Presidentin e Shqipërisë, Ilir Meta e quan një humbje të madhe për Shqipërinë dhe Kosovën. Në postimin në facebook, kreu i shtetit ka ndarë një video nga takimi me Powel në Tiranë. ”Gjatë vizitës së Tij në Tiranë u dakorduam se kishte ardhur koha për të kaluar nga politika standarde para statusit për Kosovën, drejt politikës standarde dhe status njëkohësisht, që do t’i paraprinte atij deklarimi historik nga Presidenti Bush, gjatë vizitës në Tiranë, për Kosovën”.

Postimi i plotë nga Presidenti Ilir Meta

Ndarja nga jeta e ish-Sekretarit Amerikan të Shtetit, Colin Powell është një humbje e madhe edhe për vendin dhe kombin tonë. Një mik i jashtëzakonshëm, i paçmuar, gjithmonë mbështetës për anëtarësimin e Shqipërisë në NATO dhe për Pavarësinë e Kosovës.

Në veçanti, angazhimi i Tij për Kartën e Adriatikut, që u nënshkrua në 2 maj 2003 në Tiranë, ishte shumë i rëndësishëm për të përgatitur anëtarësimin tonë në NATO në mënyrë të pakthyeshme.

Po kështu gjatë vizitës së Tij në Tiranë u dakorduam se kishte ardhur koha për të kaluar nga politika standarde para statusit për Kosovën, drejt politikës standarde dhe status njëkohësisht, që do t’i paraprinte atij deklarimi historik nga Presidenti Bush, gjatë vizitës në Tiranë, për Kosovën. Kujtimi i Tij do të mbetet i përjetshëm! Të prehet në paqen e merituar!