Skema e mashtrimit me kreditë, caktohet data e seancës dëgjimore të deputetëve të PD-së me Gent Sejkon

Pas skandalit që bëhet me dhënien e kredive në vend, deputetët e PD-së kërkuan një seancë dëgjimore me Guvernatorin e Bankës se Shqipërisë, Gent Sejko. Shqetësimi i tyre lidhet me problemin e kredive të administruara nga Micro Credit Albania sh.a. Seanca dëgjimore u caktua ditën e martë, në orën 11:00.

Prokuroria e Tiranës ka vlerësuar se guvernatori i Bankës së Shqipërisë duhet të hetohet për “shpërdorim detyre” nga SPAK, pasi dyshohet se mori masa të vonuara dhe të papërshtatshme për të frenuar skemën e dyshuar të mashtrimit ndaj mijëra qytetarëve nga shoqëria e mikrokredive MCA.

Por vetë Sejko është shprehur se s’ka informacion zyrtar nga SPAK-u apo nga Prokuroria e Tiranës, ndërsa theksoi se Banka e Shqipërisë nuk ka atribut për të hetuar mashtrimet financiare.