”Sofra e vjetër” në Tragjas të Vlorës, Rama: Një nga vendet e rralla plot traditë të vjetër shqiptare
”Sofra e vjetër” në Tragjas të Vlorës është një nga vendet e rralla plot traditë të vjetër shqiptare që magjeps këdo. Kryeministri Edi Rama ka postuar foto në Facebook nga ky stan, i cili është i ngritur në kodrat e gjelbëruara të Tragjasit të vjetër, mbi detin Jon. Kreu i qeverisë thekson edhe se ky stan ka një lloj magjie brenda tij, sa duket si i dalë nga ato përrallat.
Postimi i plotë
“Sofra e vjetër” në Tragjas të Vlorës është një nga ato vendet e rralla plot traditë të vjetër shqiptare që mahnit këdo që e viziton. Ngritur në kodrat e gjelbëruara të Tragjasit të vjetër, mbi detin Jon, ky stan ka një lloj magjie brenda tij, sa duket si i dalë nga ato përrallat.
Melodia e fyellit të Sofos, fjetja në shtëpizat me çati të punuara me kashtë, ushqimi i gatuar me saç e teknika të tjera të vjetra të stërgjysheve, natyra e bukur, qetësia dhe mirësia e këtyre njerëzve të jashtëzakonshëm, ia shtojnë vlerat këtij vendi dhe na kthejnë pas në kohë, atëherë kur barinjtë dhe bagëtia mbushnin kodrat e Tragjasit, e gjitha e jetuar në një jetë tjetër.
