“Sot ka disa dështakë që vijojnë nën gjurmët e Lulit”, djali i Bujar Nishanit: Bab, Shqipëria do bëhet

Djali i Presidentit të ndjerë Bujar Nishani, Ersi Nishani i cili është pjesë e strukturave të Partisë Demokratike, i ka dedikuar disa rreshta babait të tij sot, për 32-vjetorin e themelimit të PD-së.

Në një postim në Facebook, i riu shkruan se Bujar Nishani ka qenë i pari që ka kërkuar largimin e Lulzim Bashës nga PD-ja, pasi e ka kuptuar lojën e tij.

Ersi Nishani shton më tej se Shqipëria do të bëhet, pikërisht ashtu siç shpresonte babai i tij. Po ashtu ai nënvizon se sot në PD, ka ende disa dështakë që vijojnë nën gjurëmt e Bashës.

Postimi i plotë

Ti ishe i pari që ngrite zërin dhe kërkove dorëheqjen e Lulzim Bravës nga misioni i tij për të shkatërruar opozitën dhe demokracinë në Shqipëri! Ti ishe i vetmi që akuzove publikisht Lulzim Bravën për komplote mbrapa krahësh dhe përçarje të opozitës në bashkëpunim me Edi Ramën!

Ti e doje këtë parti me gjithë zemër, pa interes material apo vetjak, sepse Ti kishe kapur majat e karrierës tënde, por e shihje PD-në si shpresën e vetme për një Shqipëri më demokratike!

Më vjen mirë që arrite të shohësh rithemelimin e PD-së, ashtu siç deshiroje ti. Sot ende ka disa dështakë që vazhdojnë nën gjurmët e Lulit, sabotimin e opozitës dhe demokracisë në Shqipëri.

Këta dështakë do të vazhdojnë, pasi ndryshe nga ty, ata shohin interesin material dhe vetjak, atyre nuk i bëhet vonë as për demokratët, as për opozitën, as për demokracinë. Por ashtu siç më thoje ti gjithmonë drejtësia vonon, por nuk harron.

Dhe ata që lë pas, sot 1 vit mbas Kuvendit madhështor të Rithemelimit po vazhdojnë kauzën tende, për një Shqipëri më demokratike, më të lirë. Po bab, Shqipëria do bëhet! Na mungon të gjithëve.