Sot miratohet ikja e inkriminuarve nga parlamenti e administrata publike

Sot pritet të miratohen amendamentet kushtetuese të nevojshme për t'i hapur rrugë dekriminalizimit të politikës dhe administratës publike.
 
Këtë pasdite pritet të mblidhet komisioni i posaçëm parlamentar për dekriminalizimin, e pas miratimit amendamentet do t'i kalojnë më tej seancës plenare për votim.

Në mbledhjen e 23 nëntorit të këtij komisioni e cila zgjati deri në mbrëmje, palët politike ranë dakord që propozimet për ndryshimet kushtetuese të përmblidhen në 4 nene në mënyrë që të mos preken shumë nene të dokumentit themeltar të shtetit. Fillimisht ishin parashikuar ndryshimi i 17 neneve.

Më herët opozita dhe mazhoranca miratuan në komisionin e dekriminalizimit një draft të përbashkët për këtë proces. Opozita kërkonte që politikanët t'i nënshtroheshin edhe testit të drogës por kjo pikë u rrëzua nga mazhoranca në komision.

Ndryshimet kushtetuese parashikojnë kategoritë e zyrtareve që nuk mund të zgjidhen në poste të larta ose duhet të lenë mandatet në rast se kanë kryer shkelje në të shkuarën.