Sot shkrihen 9 Gjykata të Shkallës së Parë. Meta: Harta e re gjyqësore, një anti-reformë

Nga sot, 1 Maj, nuk do të funksionojnë 9 Gjykata të Shkallës së Parë në rrethe dhe 9 prokurori. Gjykatat e Shkallës së Parë riorganizohen dhe nga 22 mbeten 13. Gjykatat e Shkallës së Parë që mbyllen janë në Tropojë, Mat, Kurbin, Krujë, Pukë, Lushnje, Kavajë, Përmet dhe Pogradec.

Kryetari i Partisë së Lirisë, Ilir Meta theksoi se Ramaforma në drejtësi, në kundërshtim të plotë me të gjitha ndryshimet e bëra para 7 vitesh, po shkatërron aksesin e qytetarëve për drejtësi.

“Nga sot dhjetëra mijëra qytetarëve do t’u hiqet mundësia për të ndjekur çështjet e tyre në gjykata dhe prokurori. Nga sot për fat të keq dhe Gjykatat e Shkallës së Parë do të mbyllen në Lushnjë, në qytetin e Kongresit, në Pogradec, në Kavajë, në Kurbin, në Mat, Tropojë, Përmet etj. Ramaforma në drejtësi në kundërshtim të plotë me të gjitha ndryshimet e bëra para 7 vitesh po shkatërron aksesin e qytetarëve për drejtësi, po shton zvarritjet, burokracitë dhe po u rrit kostot që t’i lërë ata pa drejtësi”, tha ai.

Po ashtu, Meta tha edhe se harta e re gjyqësore është një anti-reformë, pasi nuk merr parasysh largësinë e qytetarëve nga gjykatat dhe mundësitë e kufizuara të transportit. ”Më 14 Maj qytetarët e Shqipërisë do të votojnë edhe kundër Ramaformës, e cila po ua bën drejtësinë edhe më të pamundur, edhe më të paarritshme, edhe më të shtrenjtë, në mënyrë që t’i lërë pa drejtësi”, tha Meta.