Spartak Ngjela: Shqiptarët le ti bien këmbës aty në kufi. Rama, mos lejo asnjë të hyjë!

Bllokimi i emigrantëve shqiptarë në kufi nga policia jonë ka shkaktuar reagime të ashpra në opinionin publik kundër qeverisë. Shumica e qytetarëve e cilësojnë jo humane lënien pa ushqim dhe në temperatura minus gradë të patriotëve të tyre. Edhe pse vendi kërcënohet nga koronavirusi, një zgjidhje humane e propozuar është që ata të hyjnë në territorin e vendit dhe të karantinohen me detyrim.

Por avokati i njohur Spartak Ngjela thotë se shqiptarët që duan të vijnë në atdhe le ti bien këmbës në kufi. Në një postim në Facebook ai i bën thirrje Edi Ramës të mos lejojë këmbë shqiptari që të kalojë doganat, pasi na rrezikojnë me vdekje.

Postimi i plotë i Spartak  Ngjelës në Facebook:

“Hyrjedaljet e kufirit shqiptar janë sot portat kastriotiane të Krujës së viteve 1444 – 1468. Nuk duhet të lejohet të hyjë askush.

Shqipëria kërcënohen nga vdekja e hordhive të një virusi vdekjeprurës.

Kryeministri shqiptar duhet t’i qëndrojë me stoicizëm mbylljes së kufirit. Kush kërkon hapjen e kufirit shqiptar, po kërkon vdekjen masive të shqiptarëve. Le t’i bien këmbës: Shqiperia po shkon drejt shpëtimit kombëtar të jetës. Shqiptarët po tregojnë forcë për të mbrojtur jetën kombëtare. Kjo forcë do ta japë shpejt shpërblimin vet historik”.