Sulmi kibernetik, Balluku dhe drejtoresha e AKSHI-t: 98% e shërbimeve funksionale. S’ka humbje të dhënash

Zv.Kryeministrja, Belinda Balluku, drejtorja e AKSHI-t Linda Karcanaj dhe përfaqësuesi i skuadrës speciale të Microsoft për sigurinë kibernetike, Kevin Chin japin detaje lidhur me sulmin masiv ndaj sistemeve, punën e bërë për rikthimin në normalitet të shërbimeve si edhe masat e marra për më tutje.

Ato thanë se gjithçka po kthehet në normalitet, ata thanë se nuk pati asnjë humbje të dhënash. Drejtoresha Karcanaj tha se mbi 98% të shërbimeve janë tashmë funksionale.

“Më në fund administrata publike i është kthyer normalitetit dhe proceseve të punës. AKSHI ka rekuperuar të gjitha sistemet dhe strukturat qeveritare. Po punojmë me partnerët e Microsoft. Ky është sulm që nuk kishte ndodhur ndonjëherë ndaj vendit tonë. Qëllimi ishte fshirja e sistemeve kritike qeveritare dhe të të dhënave. Sistemet mbrojtëse bënë që të mos kishte humbje të dhënash”, tha Kacanaj.

Sulmi kibernetik në platformat qeveritare online ka ardhur nga e njëjta dorë që ka bërë sulmet vitin e fundit në shumë vende evropiane. Qeveria garantoi të gjithë shqiptarët se reagimi ka qenë i shpejtë dhe të gjitha faqet dolën të paprekura dhe janë të sigurta.