Tafaj: Për 3 vjet rrogat në arsim nuk u rritën. Rama po ua rrit për t’u marrë votat

Deklaratat e kryeministrit Edi Rama i cili u tha mësuesve sot se, për herë të parë në 25 vjet, do të rriten pagat e tyre me 10%, kanë shkaktuar reagimin e ish-ministrit të Arsimit Myqerem Tafaj.

Deputeti demokrat teksa i cilëson si të pavërteta deklaratat e Ramës, thekson se gjatë këtyre tre viteve pagat e në arsim nuk janë rritur me asnjë qindarkë, dhe sipas tij, rritja e pagave nga qeveria është “e detyruar” nga fushata zgjedhore për zgjedhjet e ardhshme parlamentare.

Deklarata e ish-ministrit Myqerem Tafaj

Rama u tha mësuesve sot se, për herë të parë në 25 vjet, do të rriten pagat e tyre me 10%!

Kjo është e pavërtetë. Për tre vjet të qeverisjes Rama pagat në arsim nuk u rritën asnjë qindarkë. Përkundrazi, vetëm për shkak të inflacionit, ato kanë rënë 5.8%, pa llogaritur efektet e tjera negative të taksës progresive, etj. Tani që filloi viti elektoral Qeveria u kujtua të rrisë pagat në arsim me 10%, Por kjo rritje nuk arrin as të mbuloj indeksimin e inflacionit në 4 vite të kësaj qeverie.

Pagat e edukatoreve dhe të mësuesve janë rritur, ne vitin 2013, nga 2,1 deri në 2,4 herë sipas shkallëve të kategorive, krahasuar me 2005-ën. Janë rritur 125 deri 147 % pagat e punonjësve të arsimit parauniversitar në krahasim me vitin 2005. Paga mesatare mujore për punonjësit e arsimit parauniversitar nga 23.665 lekë – paga bruto (19.000 lekë paga neto) në vitin 2005, arriti në 54.000 lekë – paga bruto (42.560 paga neto) në vitin 2013.

Paga mesatare ne arsimin parauniversitar (parashkollor, arsimi nëntëvjecar dhe atë të mesëm) është rritur ne vitin 2013 me 126% krahasuar me 2005.

Në vitin 2013, pagat e personelit akademik në universitetet publike u rritën me 25 deri 69 % në krahasim me v. 2005. Paga mesatare mujore për personelin akademik nga 59.700 lekë- paga bruto (50.000 paga neto) në vitin 2005, arriti në 93.000 lekë – paga bruto (74.700 lekë – paga neto), në vitin 2013. Paga mesatare mujore (bruto) e stafit akademik në institucionet e arsimit të lartë publik është rritur me 56% krahasuar me 2005. Në këtë rritje nuk është përfshirë pagesa për orët suplementare, pra mbi normën mësimore.