Të tjerë deputetë të ”grupit Alibeaj”, dalin pro idesë së Berishës për zgjedhjet lokale

Kreu i grupit parlamentar të PD-së, Enkelejd Alibeaj nuk është dakort që opozita të ketë një kandidat të përbashkët për zgjedhjet lokale të 2023, por duhet sipas tij që PD-ja të paraqesë vetëm kandidatët e saj.

Deputeti Agron Gjekmarkaj thotë se vetëm me kandidatë të përbashkët ka shanse opozita për gare reale për zgjedhjet lokale të 2023-shit. ”Me kandidat të përbashkët opozita ka shanse reale gare. Por nuk e di të jetë mbledhur grupi parlamentar dhe të jenë marrë vendime, si i vetmi institucion që e ka këtë tager në kushtet ku jemi”.

Kurse Ervin Salianji, nënkryetar i grupit parlamentar, tha se është fat i keq për demokratët që të zgjedhurit e tyre janë në garë inati me njëri-tjetrin. Për të opozita duhet të jetë e bashkuar.

Të njëjtin qëndrim duket se ka mbajtur dhe deputetja Dhurata Çupi e cila është me grupin e Alibeajt, por pohon se PD-ja duhet të përfaqësohet në lokalet me një kandidat. Më radikal është treguar deputeti i Lushnjës, Saimir Korreshi, i cili pohoi se nëse ndodh që PD të dalë me dy kandidatë, nuk do të marrë pjesë në zgjedhje personalisht si deputet.