Tedi Blushi akuzon me fakte Bashkinë Roskovec: Kërkon të ndërtojë TEC në tokë bujqësore, pasoja të rënda për qytetarët

Sekretari i Përgjithshëm i Partisë së Lirisë, Tedi Blushi akuzon Bashkinë Roskovec. Teksa ka postuar disa dokumente që tregojnë se po tentohet t’i hapet rrugë një projekti për ndërtimin e një termocentrali në një zonë bujqësore, Blushi shprehet se një projekt i tillë kundërshtohet nga Partia e Lirisë, teksa thekson se TEC-i do të sjellë pasoja të rënda të rënda për shëndetin dhe jetën e qytetarëve, por edhe për pronat e tyre.

Postimi i plotë

Kriminale dhe e pabesë (siç di vetëm “Rilindja”) tentativa e Bashkisë së Roskovecit për t’i hapur rrugën ndërtimit të një termocentrali në zonën bujqësore të fshatit Suk dhe rrethinave të tij, duke u çuar “vdekjen” te dera e shtëpisë, një komuniteti të mrekullueshëm dhe punëtor, që aq shumë ka vuajtur nga ndotja dramatike e puseve të naftës.

Zona e Roskovecit është një zonë bujqësore e suksesshme, e mbjellë deri në 700 hektar me sera, që duhet të mbështetet fuqimisht me subvencione dhe jo të asgjësohet përfundimisht me të tilla projekte shkatërrimtare, korruptive dhe me pasoja tepër të rënda për shëndetin dhe jetën e qytetarëve, por edhe për pronat e tyre.
Qytetarët e nderuar të Roskovecit meritojnë urgjentisht transparencë:

Pse nuk janë vënë në dijeni të projektit dhe pse nuk janë thirrur kurrë në dëgjesa publike?

Kush është investitori privat dhe kush përfiton financiarisht nga ky projekt, qartazi në dëm të banorëve, dhe sidomos të fermerëve?

Pse TEC-i do ndërtohet në një tokë të punueshme, që ligji e ndalon?

A është ndërtimi i TEC-it të Roskovecit një skemë kriminale e ngjashme me inceneratorët

Kundërshtojmë me forcë këtë projekt dhe mbështetim plotësisht shqetësimin e drejtë të komunitetit të dashur të Roskovecit.