Terminali i ri në Rinas, Rama: Qytetarët nuk do të kenë kontakt me policin që i sheh në sy kur kalojnë pasaportën

Nga inagurimi i terminalit të ri në Rinas këtë të dielë, kryeministri Edi Rama tha se do të shtohen 8 porta të reja dhe po ashtu tani ka teknologji të re në leximin e pasaportave. Rama informoi edhe se nga nesër të gjithë qytetarët me pasaportë shqiptare që vijnë në aeroportin e Rinasit, nuk do kenë lexim manual të pasaportës nga polici që i sheh në sy e sheh pasaportën, por do të kalojnë në barrierën digjitale me leximin digjital.

“Sot është vënë në punë sistemi i ri teknologjik i leximit të pasaportave në hyrje, kjo falë angazhimit të ministrit të Brendshëm, policisë së Shtetit dhe kompanisë e cila që në ditën e parë të nënshrkimit të marrëveshjes së re pasi bleu nga koncesionari i mëparshëm të drejtën e operimit, është angazhuar në të gjithë frontin e punëve që duhen bërë në këtë aeroport.

Nga nesër, të gjithë qytetarët me pasaportë shqiptare që vijnë në aeroportin e Rinasit nuk do kenë lexim manual të pasaportës nga polici që i sheh në sy e sheh pasaportën, por do të kalojnë në barrierën digjitale me leximin digjital, process që zgjat më pak se gjysmë minuti. Kjo do të lehtësojë fluksin e hyrjeve.

Kjo vlen edhe për qytetarët e BE, SHBA, Britanisë së Madhe e Kanadasë. Për të tjerët do ketë process kalimi me lexim manual të pasaportës”, tha Rama.