”Tirana e para në shembjen e tiranisë”, Meta takim me strukturat e partisë: Rama e betonizoi qytetin

Nuk ka pushim për Ilir Metën. Këtë pasdite të së mërkurës, ai po zhvillon një takim me strukturat dhe përfaqësuesit  e Partisë së Lirisë për degën e Tiranës. “Ndezim motorët dhe bashkojmë energjitë: Nga nesër Tirana e para në shembjen e tiranisë”, është ky mesazhi që Meta ka ndarë.

Po ashtu Ilir Meta akuzoi kryeministrin Edi Rama, duke thënë se ka qenë nismëtari i betonizimit të kryeqytetit duke e nisur rrugëtimin e tij politik me vjedhjet e 20% dhe e vazhdon me vjedhje 500% pasi po realizon sipas tij autostradat me kilometrin e asfaltit me të shtrenjtë në të gjithë Europën.

”Tirana ka përjetuar më shumë së gjithkush tiraninë e këtij sekti akut dhe antikombëtar që e nisi duke u përpjekur të vjedhë meritat e ish-kryeministrit Ilir Meta për t’i rikthyer Tiranës parqet e gjelbërta. Për të ruajtur atë trashëgimi kulturore që kishte Tirana nga e kaluara siç ishte Teatri Kombëtar për ta kthyer sot në Tiranën e betonit ku nuk dallohet më kulla e Sahatit se kanë lindur kulla të tjera qiellgërvishtëse. Tirana ka hak për të marrë në kuptimin e vërtetë të kësaj fjale, shumë shpejt për t’ia kthyer padrejtësinë me drejtësi”.