Titulli “Mjeshtër i Madh” për profesor Sherif Bundo, Presidenti Meta: Edukon rininë në fushën e financës dhe kontabilitetit

Presidenti Ilir Meta ka dekoruar me titullin ”Mjeshtër i Madh”, profesor Sherfi Bundon për të cilin thotë se prej dekadash është i angazhuar në edukimin e brezave të rinj në fushën e financës dhe kontabilitetit. ”Mirënjohje për ndihmesën e rëndësishme të dhënë në rritjen e rolit të biznesit shqiptar dhe angazhimit të tij të çmuar në ndihmë dhe në përkrahje të zërit të sipërmarrësve vendas”,-shkruan Meta në facebook.

Postimi i plotë

Profesor Sherif Bundo është një personalitet i shquar i shkencave ekonomike, autoritet i spikatur akademik dhe i respektuar në shoqërinë shqiptare, i cili prej dekadash është i angazhuar në edukimin e brezave të rinj në fushën e financës dhe kontabilitetit.

Në vlerësim të kontributeve të vyera shkencore dhe publike, në financa e mësimdhënie në shkollat e larta ekonomike, duke manifestuar ndjenjë të lartë përgjegjësie publike dhe profesionalizmi në mbrojtjen e pakompromis të interesave kombëtare, i akordova sot Titullin e lartë “Mjeshtër i Madh”.

Mirënjohje për ndihmesën e rëndësishme të dhënë në rritjen e rolit të biznesit shqiptar dhe angazhimit të tij të çmuar në ndihmë dhe në përkrahje të zërit të sipërmarrësve vendas.