“Tradhtari më i madh”, Berisha: Basha preu kolonat që PD kishte ngritur

Ish-kryeministri, Sali Berisha ditën e sotme ka zhvilluar homazhe në shtatoren e Azem Hajdarit tek Qyteti Studenti me rastin e 8 Dhjetorit, Ditës së Rinisë.

Lideri historik i PD dhe të pranishmit vendosën kurora me lule në shtatore. Më pas ish-kryeministri mbajti fjalën përshëndetëse dhe tha se në sheshin ku ndodhej filloi revolucioni paqësor më i madh në historinë e kombit shqiptar.

Gjatë takimit Berisha nuk nguroi të sulmojë kreun e PD-së Lulzim Basha për të cilin tha se preu kolonat mbi të cilat PD ishte ngritur, parimet dhe idealet e saj.

“Drejtuesi i PD preu një nga një kolonat që ajo ishte ngritur. Preu parimet dhe idealet ku qëndronte. Nëse themi se Edi Rama armiku më i egër i pluralizmit, Lulzim Basha është tradhtari më i madh i tyre. Mirëpo llogaritë e Edi Ramës duke marrë peng Bashën nuk do të dalin”, tha Berisha.

Më tej Berisha theksoi se sot jemi më të vendosur se kurrë të rithemelojmë partinë e vitit 1990.