Ultimatumi nga Kim dhe qëndrimi i Berishës ndaj SHBA, Patozi: Deri më tani ka ”fituar” Basha

Shpallja ”Non-Grata” e Sali Berishës nga Departamenti Amerikan i Shtetit, është tema më aktuale e politikës. Ish-deputeti i PD-së, Astrit Patozi, thotë se në këtë situatë çudia e madhe është Lulzim Basha. ”Deri tani ia ka dalë që të marrë njëkohësisht vlerësimet e të dyja palëve ndërluftuese, si të Sali Berishës, ashtu edhe të ambasadores Kim. Të dy ata kanë deklaruar se kanë pasur një bisedë shumë të mirë me kryetarin e PD për çështjen e doktorit “non grata””,-shkruan Patozi në facebook.

Postimi i plotë

DERI TANI KA “FITUAR” VETËM BASHA

Dënimi amerikan për Berishën duket se do të mbetet e vetmja temë e rëndësishme politike e kësaj vere tmerrësisht të nxehtë. Por çudia e madhe e këtij debati, që po arrin kulme të reja, është Lulzim Basha, i cili po shkëlqen edhe me heshtjen e vet.

Sepse deri tani ia ka dalë që të marrë njëkohësisht vlerësimet e të dyja palëve ndërluftuese, si të Sali Berishës, ashtu edhe të ambasadores Kim. Të dy ata kanë deklaruar se kanë pasur një bisedë shumë të mirë me kryetarin e PD për çështjen e doktorit “non grata”.

Si të mos ishte hallexhiu, që duhet të bëjë patjetër një zgjedhje përvëluese, por si ta kishin caktuar arbitër apo ndërmjetësues për ta mbyllur luftën pa të lënduar. Dhe kjo është meritë, që i duhet njohur, të paktën deri në shtator.