Unioni i Gjyqtarëve të Shqipërisë: Rekomandimet e Venecias të jenë edhe në raportin përfundimtar

Unioni i Gjyqtarëve të Shqipërisë (UGJSH) dhe Shoqata Kombëtare e Gjyqtarëve të Shqipërisë (SHKGJSH) kanë përshëndetur raportin paraprak të Komisionit të Venecias lidhur me problemet që ka sjellë vettingu në gjykatat kryesore të vendit.

Në një deklaratë për shtyp organizatat e pavarura të drejtësisë shprehen se “shoqatat e gjyqtarëve shqiptarë inkurajojnë me forcë Komisionin e Venecias, që rekomandimet e bëra në pikën 111 të këtij draft-opinioni të pasqyrohen edhe më gjerë në Opinionin përfundimtar të këtij Komisioni.  UGJSH dhe SHKGJSH  janë të bindura se, integriteti i lartë moral e profesional i anëtarëve të Komisionit të Venecias do të garantojë pasqyrimin e këtyre rekomandimeve edhe në versionin përfundimtar të këtij Opinioni, me paanësi dhe pavarësi të plotë nga palët e përfshira në këtë raport”.

Deklarata e plotë e Unioni i Gjyqtarëve të Shqipërisë (UGJSH) dhe Shoqata Kombëtare e Gjyqtarëve të Shqipërisë (SHKGJSH)

Unioni i Gjyqtarëve të Shqipërisë (UGJSH) dhe Shoqata Kombëtare e Gjyqtarëve të Shqipërisë (SHKGJSH) kanë ndjekur me vëmendje pasqyrimin e bërë ditët e fundit nga programi në gjuhën  shqipe i radios “Zëri i Amerikës”,  të draft-opinionit  nr.CDL (2002)011, dt.06.03.2019 të përpiluar nga Komisioni i Venecias, sa i përket procesit të vetting-ut që po zhvillohet aktualisht në Shqipëri.

UGJSH dhe SHKGJSH përshëndesin gjetjet e Komisionit të Venecias sa i përket procesit të vetting-ut (shkronja D, pika 37, 38, 39, 40, 41, 42, dhe 43), i cili pavarësisht domosdoshmërisë dhe nevojës për pastrimin e sistemit gjyqësor nga paaftësia dhe korrupsioni, gjithësesi solli pasoja të paparashikueshme, jo vetëm për Gjykatën Kushtetuese dhe Gjykatën e Lartë, por edhe për gjithë sistemin gjyqësor dhe funksionimin e shtetit të së drejtës dhe sundimin e ligjit në Shqipëri.

Shoqatat e gjyqtarëve shqiptarë inkurajojnë me forcë Komisionin e Venecias, që rekomandimet e bëra në pikën 111 të këtij draft-opinioni të pasqyrohen edhe më gjerë në Opinionin përfundimtar të këtij Komisioni.  UGJSH dhe SHKGJSH  janë të bindura se, integriteti i lartë moral e profesional i anëtarëve të Komisionit të Venecias do të garantojë pasqyrimin e këtyre rekomandimeve edhe në versionin përfundimtar të këtij Opinioni, me paanësi dhe pavarësi të plotë nga palët e përfshira në këtë raport.

Gjyqtarët shqiptarë janë të bindur se, vetëm zbatimi i këtyre rekomandimeve gjatë procesit të vetting-ut, të sugjeruara nga Komisioni i Venecias, do të garantojë në përputhje me ligjin, Kushtetutën e Republikës së Shqipërisë dhe Konventën Europiane të të Drejtave të Njeriut:

• zbatimin e të drejtave dhe lirive themelore të individit;
• parimin e prezumimit të pafajësisë;
• parimin e së drejtës për një mbrojtje efektive në kohë dhe në hapësirë;
• parimin e zhvillimit të një procesi të rregullt ligjor;
• parimin e sigurisë juridike;
• mbrojtjen e jetës personale dhe familjare të magjistratëve;
• barazinë para ligjit të të gjithë magjistratëve dhe atyre që aspirojnë për tu bërë magjistratë në shkallët më të larta të sistemit gjyqësor.

Shoqatat e gjyqtarëve shqiptarë garantojnë opinion publik se, do të jenë gjithmonë në mbështetje të proceseve reformuese, të cilat kanë si qëllim final rritjen e besimit të publikut të Drejtësia, forcimin e shtetit të së drejtës dhe sundimin e ligjit në Shqipëri si dhe mbrojtjen e të drejtave të magjistratëve shqiptarë.