Veliaj pret në zyrë efektivët e Policisë Bashkiake: Puna juaj i ka shtuar vlerën investimeve në Tiranë

Kryetari i Bashkisë së Tiranës, Erion Veliaj priti një përfaqësi të Policisë Bashkiake, të cilët i falenderoi për punën e bërë në kryeqytet, sidomos në dy momente kyç gjatë këtij viti, njëra prej të cilave ishte shpëtimi i jetës së një qytetari.

“Një nga momentet ishte incidenti që patëm me Presidentin e Republikës. E vlerësoj punën tuaj sepse pavarësisht se kush është autoriteti, se çfarë imuniteti ka, apo pavarësisht çfarë detyre shtetërore ka, në këtë qytet jemi të gjithë të barabartë. Askush nuk lejohet të zaptojë, askush nuk lejohet të dhunojë një uniformë, që është aty për të na shërbyer të gjithëve, dhe askush nuk lejohet që qytetin ta kthejë në sebep për sherr, apo për pikë politike. Momenti tjetër kyç ka të bëjë me parandalimin e një akti të dëshpëruar, që dikush ndoshta edhe për trazimin e tij, e ka menduar si zgjidhje, por fundi i jetës nuk është zgjidhje dhe detyra e policisë është edhe të ndihmoje ne parandalimin e akteve të tilla”, u shpreh Veliaj.

Kryebashkiaku vuri theksin te rëndësia që ka ekipi i Policisë Bashkiake, sidomos në ruajtjen e investimeve të bëra në kryeqytet.

Kryeinspektori i Policisë Bashkiake falenderoi kryebashkiakun Veliaj për mbështetjen e dhënë: “Ne jemi më të motivuar se kurrë që ta mbajmë këtë qytet me rregulla, të punojmë sa më shumë, të jemi sa më afër qytetarëve, për ta bërë Tiranën qytetin më të vizituar edhe nga turistët, por edhe nga qytetarët e Tiranës.”