Veliaj: Promovimi i aktiviteteve kulturore në rrjetet e mia sociale u trajtuan si skenë krimi

Aktualitet Politikë E Diel, 2 Mars 2025 14:10

Kryetari i Bashkisë së Tiranës, Erion Veliaj, i cili ndodhet në masën e sigurisë “arrest me burg” me kërkesë të Prokurorisë Speciale Antikorrupsion (SPAK) dhe vendim të Gjykatës Speciale Antikorrupsion (GJKKO), pasi është duke u hetuar për dy vepra penale.

Veliaj ka reaguar sot ndaj akuzave të ngritura lidhur me postimet e tij në rrjetet sociale, duke e cilësuar këtë si një sulm të pabazuar.

Në një postim në Facebook, Veliaj u shpreh se ka qenë e padrejtë të trajtohen rrjetet sociale të kryebashkiakut, ku janë promovuar aktivitetet kulturore dhe artistike të Tiranës si një “skenë krimi”.

Ai theksoi se postimet për ngjarjet kulturore, si “International Contemporary Dance Festival”, janë të zakonshme për çdo kryetar bashkie dhe bëhen me qëllim informimin e qytetarëve dhe turistëve. Veliaj sqaroi gjithashtu se këto postime janë realizuar nga stafi i zyrës së shtypit dhe jo nga vetë ai, duke u kërkuar ndjesë qytetarëve për këtë keqkuptim.

Kryebashkiaku theksoi gjithashtu se aktivitetet kulturore të qytetit, si baleti i Preljocajt, janë një pasuri dhe duhet të promovohen pa frikë, ndërsa akuzat dhe trajtimi i tyre si “krim” janë një goditje e padrejtë ndaj punës së tij dhe stafit të bashkisë.

Ai përfundoi postimin me një thirrje për durim dhe forcë, duke e mbyllur mesazhin me një urim për një agjërim të lehtë.

Postimi i plotë i Kryebashkiakut Erion Veliaj:

Pse ma le “seen”?

Të dielë të mbarë të gjithëve dhe shumë mall për secilin prej jush!

Duke qenë se padrejtësia nuk bën asnjë ditë pushim, do të më mirëkuptoni nëse edhe sot më duhet të çmontoj një tjetër akuzë, kësaj here lidhur me Facebook-un dhe Instagram-in tim, ndaj dhe titulli “pse ma le ‘seen’” – reagimi patetik i adoleshentëve në rrjete, kur dikush s’i përfill.

Fiks kështu reagon Ols Dado kur e trajton Facebook-un dhe Instagram-in zyrtar të Kryetarit të Bashkisë si skenë krimi!

Nuk ju besohet? Lexojeni vetë:

“Nga procesverbali i kqyrjes datë 21.01.2025, i përpiluar nga hetuesi i Byrosë Kombëtare të Hetimit (BKH), rezulton se në rrjetin social “Instagram”, tek adresa “Erion Veliaj”, evidentohet një postim i bërë nga ky i fundit më datë 20 shtator 2023. Ky postim lidhet me eventin që do të organizohet më datën 23.09-22.10.2023 “International Contemporary Dance Festival”. Në vijim të tekstit publikohet edhe kalendari i shfaqjeve. Postimi në total përmban 8 fotografi/reklama/postera njëra pas tjetrës. Festivali është nën drejtimin artistik të koreografit të mirënjohur me origjinë shqiptare, Angjelin Preljocaj”.

Po mor po, e lexuat vetë! Trajtohet faqja e Facebook-ut dhe Instagram-it si skenë krimi, si të ishte Bataclan ku vranë terroristët apo skena e fluturimit MH17, që e gjetën këta pas kaq vitesh. “Kqyrje”, “procesverbale”, “evidentohet”, “rezulton me aq e kaq postera e foto”, si me thënë “kaq të vrarë e aq të plagosur”.

Çfarë fyerje për inteligjencën e kujtdo! Domethënë, akuzohem se në Facebook-un dhe Instagram-in tim janë publikuar fotot e shfaqjeve të Preljocajt, të cilin këta vetë e pranojnë se e drejtonte projektin dhe jo familjarë të mitë.

Së pari, çdo kryetar bashkie poston aktivitete kulturore e artistike të qytetit dhe as më besohet që më duhet ta shpjegoj këtë. E kam gjetur Tiranën me 10 evente në vit, sot ka mbi 1 mijë aktivitete cilësore në vit. Postohen sa mundet për të informuar publikun e të huajt që vijnë si turistë. Gjëja më normale në botë.

Së dyti, Preljocaj dhe trupa e tij janë ëndërr për çdo qytet, dhe jo vetëm çdo qytet do t’i financonte, por do t’i promovonte me trumpetë e bori, me tellall e reklama kudo, aq më tepër Tirana.

Por, së treti, meqë më duhet të shpjegoj me logjikën idioteske të hetimit të Facebook-ut dhe Instagram-it, rezulton se postimi as nuk është bërë nga unë vetë, por nga stafi i zyrës së shtypit, ashtu siç ndodh rëndom për shumë bashki e ministri. Mjafton të shikoni screenshot-et e postimeve për të kuptuar se edhe ky postim, pra për baletin e Preljocajt, është bërë nga stafi i zyrës së shtypit – edhe pse tani që po e kuptoj sa “krim i rëndë” paska qenë, do të doja ta kisha bërë vetë, por ato ditë kam qenë në SHBA për një udhëtim pune.

Ndërsa, në këtë fotoalbum do të shikoni me dhjetra postime, të cilat kanë promovuar aktivitete të ndryshme artistike, kulturore e sportive që kanë ndodhur në Tiranë, në po atë muaj, kur është shfaqur edhe baleti i Preljocajt.

Sa fyese që pas letrave anonime, shpalljes “i dënuar” pa gjyq, shtëpive në Yrshek, takimeve me arkitektë, më duhet të shpjegoj edhe postimet rutinë të stafit në Facebook e Instagram, në këtë veting 20 vjeçar, që s’i është bërë askujt më parë. Fiks muhabet kalamajsh “pse ma le ‘seen’”.

Kokën lart dhe agjërim të lehtë!

Postimet e kryebashkiakut Veliaj

1 nga 11