Veliaj: S’kam asgjë personale me Dukën, por është fyese të kërkosh 100 mijë euro për t’u bërë pjesë e FSHF

Kryetari i Bashkisë së Tiranës, Erion Veliaj, ka deklaruar se në betejën për FSHF-në nuk ka asgjë personale me Armando Dukën.

Ai tha se kjo betejë legjitimohet nga aksionet që Bashkia e Tiranës ka në zotërim, në një prej klubeve më të suksesshme të futbollit sot, si KF Tirana dhe bëhet në emër të qytetarëve të Tiranës, të prindërve që investojnë tek ëndrrat e fëmijëve të tyre për t’u bërë futbollistë.

“Armand Duka nuk është armiku im. S’kam asgjë personale me të, por jam përfaqësues i 34% të aksioneve të Klubit të Tiranës, i cili po përgatitet të fitoje kampionatin e radhës. Bashkia e Tiranës tashmë, ka hequr mënjanë 150 mijë euro si premio, siç bëri vjet, sepse cilido nga ekipet e kryeqytetit qe fiton kampionatin, merr çmim. Bashkia e Tiranës jep premion më të madhe në 100 vite Kryeqytetit. Për të gjitha këto arsye, nuk kam asgjë personale, por të jesh pjesë e një koreografie të shëmtuar, e një valleje të hedhur keq, e një vendi ku vidhen zgjedhjet, është shumë e shëmtuar”, tha ai.

Veliaj i quajti fyese favoret që iu bëhen familjarëve të zyrtarëve të institucionit më të rëndësishëm te futbollit, por edhe më denigruese korrupsionin në nivele të larta.

“Pse duhet të shkojnë vetëm çunat dhe gocat e bandës së Shijakut në “Wembley”, ne boksin VIP? Të jetë për mua, unë do ta dhuroj biletën time për finalen e UEFA Conference League. Më mirë të shkojë një fëmijë i shtëpisë së fëmijës. Por, historia që vetëm 1% kontrollon gjithçka, është fyese! Kurse një prind, që ka harxhuar, jo një vit, po 10-15 vite, nga 20-30 mijë lek çdo muaj, t’i thuash siç i the edhe Granit Xhakës – “Po nuk me dhe 100 mijë euro, ti nuk luan me Kombëtaren”, kjo është të fyesh jo vetëm sakrificën e mijëra prindërve, por ndërpret ëndrra fëmijësh, që janë rritur duke shpresuar të bëhen si Messi dhe Ronaldo, por në fakt përfundojnë si ‘pulat e Shijakut’,” tha Veliaj.

Sipas kryebashkiakut, shumica e qytetareve nuk jetojnë me futbollin, por nuk mund te lejohet qe ne një qytet si Tirana te bëhen të tilla padrejtësi.

“Shumë vete me pyesin – “Pse ti?”. Po kush? A mund te përballet me këta një prind që ia heqin fëmijën nga grupi? Po një trajneri që i heqin licencën? Po një ekipi – se e kanë provuar edhe ekipet – dhe i kanë zbritur dy kategori më poshtë? Pra, duhet ta bëjë dikush, që nuk ka asgjë për të humbur. Unë çfarë kam për të humbur? Unë nuk luaj futboll, djali im nuk e ka mbushur moshën të luajë, ekipi që përfaqësoj është më i miri sot në kampionat. Unë nuk po kandidoj vetë, as po ju them kë të votojmë, thjesht po ju kërkoj ‘fair play’”, përfundoi Veliaj për News24.